Күндү доҕоттор! Саха сирин биир бэлиэ күнүнэн – өрөспүүбүлүкэҕэ бокса төрүттэммитэ 60 сылынан истиҥник эҕэрдэлиибин! Үбүлүөйдээх, үөрүүлээх күҥҥэ Василий Егоров Арассыыйа чөмпүйэнээтигэр кыайыыта улахан бэлэх буолла!
Саха сиригэр спорт бу көрүҥүн үөскээһинэ САССР физическэй култуураҕа уонна спортка кэмитиэтин бэрэссэдээтэлэ Николай Тарскай көҕүлээһининэн өрөспүүбүкэтээҕи бастакы чөмпүйэнээт 1956 сылга ыытыллыаҕыттан ыла саҕаламмыта. Бу кэнниттэн хоту сиргэ спорт бу көрүҥэ киэҥник тарҕанан барбыта.
Кылгас кэм устатыгар Арсений Петров салайыытынан элбэх ситиһиллибитэ. 1964 сыллаахха ССРС чөмпүйэнээтин улахан рингэтигэр бастакынан Эдуард Кауфман тахсан, боруонса мэтээли ылары ситиспитэ. Түөрт сыл буолан баран кини өрөспүүбүлүкэҕэ кыһыл көмүс мэтээли аҕалбыта!
70-с сыллар бүтүүлэригэр, 80-с сыллар саҕаланыыларыгар Саха сирин маастардара аан дойду таһымнаах күрэхтэһиилэргэ кыттыбыттара – Александр Михайлов, Николай Жирков уонна Виктор Ефремов ааттара өрөспүүбүлүкэ боксатын историятыгар букатыннаахтык киирдилэр.
1992 сыллаахха Барселона Олимпиадатын рингэтигар Анатолий Филиппов сахалартан бастакынан тахсыбыта. Кини дьыалатын Георгий Балакшин ситиһиилээхтик салҕаабыта. Кини Олимпийскай Оонньууларга бириистээх миэстэни ылбыта, аан дойду чөмпүйэнээтин боруонса мэтээлин ылбыта, Европа үс төгүллээх чөмпүйүөнэ, Арассыыйа алта төгүллээх кыайыылааҕа, Үтүө санаа Оонньууларыгар үрүҥ көмүс мэтээли кэппитэ.
Хас биирдии ситиһии өр сыллаах үлэ, күүстээх дьарыктаныы түмүгэр кэлэр. Бокса – эр санаа көрүҥэ. Оттон спортсменнарга – дьиҥнээх искусство.
Спорт бу көрүҥүн бэтэрээннэригэр ураты тылы тиэрдэр наадалаах.
Саха сирин уопсастыбаннаһын Саха сиригэр бокса төрүттэммитэ 60 сылынан истиҥник эҕэрдэлиибин! Күүстээх санааны, үрдүк ситиһиилэри баҕарабын!
Саха сирин баһылыга Егор Борисов
