Норуоттар икки ардыларынааҕы «Азия оҕолоро» спортивнай оонньуу Саха сирин сайдыытыгар хас да хайысханан туһуланар: экономикаҕа, инвестицияҕа, тас дойдулары кытта сибээһи олохтуурга. Бу туһунан Егор Борисов «Саха» НКИК ханаалыгар эттэ.
«Биһиги Оонньууну тэрийэрбитигэр олимпизм бириинсиптэригэр олоҕурбуппут. Норуоттары сомоҕолуур күүстэргэ болҕомтону уурбуппут. Кыттааччылар уонна ыалдьыттар Саха сирин айылҕатын, олохтоох норуот култууратын билсэллэр», — диэн бэлиэтээтэ Егор Борисов.
«Азия оҕолоро» Азиатскай региоҥҥа бөдөҥ спортивнай күрэхтэһии эрэ быһыытынан буолбакка, Саха сирин имиджин норуоттар икки ардыларынааҕы аренаҕа таһаарыыга, өрөспүүбүлүкэ инвестицияҕа сабыдыалын үрдэтиигэ, экономиканы сайыннарыыга, норуоттар икки ардыларынааҕы сибээһи олохтуурга туһуланаллар.
«Оонньууга интэриэс улаатар. Тас дойдулартан бэйэлэригэр ыытыахтарын баҕаралларын туһунан этиилэр киирэллэр. Бу олус суолталаах түгэн. Делегация састаабыгар дипломатия эргимтэтин бэрэстэбиитэллэрэ бааллар. Кинилэр өрөспүүбүлүкэни үөрэтэллэр, контагы олохтууллар. Бу барыта салгыы бииргэ үлэлииргэ олук уурар», — диэн бэлиэтээтэ Ил Дархан.
