Саха сирин баһылыга Егор Борисов өрөспүүбүлүкэ социальнай-экономическай сайдыытыгар салгын тырааныспарын комплекса ураты улахан суолталааҕын «Якутия» авиакомпания туругун тупсарыыга анаммыт мунньахха эттэ.
«Сотору «МИНИИСТИР» дьыалабыай оонньуу ыытыллыаҕа, ол бэбиэскэтигэр өрөспүүбүлүкэ авиациятын салаатын салгыы сайыннарыы боппуроһа киириэҕэ », — диэтэ Егор Борисов.
Дойду авиационнай ырыынагар тыҥааһыннаах быһыы-майгы үөскээбитин мунньух кыттыылаахтара бэлиэтээтилэр. Арҕаа дойдулар бобууларын кытта ити ыкса ситимнээх. Валюта халбаҥнааһына авиациянан таһаҕаһы тиэйии бэйэҕэ турар сыанатыгар быһаччы дьайарын кинилэр ыйдылар. Холобур, ити сыаната 2015 сылга 1,5 млрд. солк. үрдээбит. 2,3 млрд. солк. суумалаах государство өттүттэн быһаччы өйөбүл үөскэтиллибит, салгын тырааныспарын уматыгын тиэйиигэ кредит бэриллибит.
«Компания үп-харчы өттүнэн туругун тупсарыыга быһаарыылаах миэрэлэри ылыахпыт», — диэтэ өрөспүүбүлүкэ баһылыга уонна хаһаайынныыр субъектары холбооһун оҥоһуллубутатын чиҥэтэн эттэ.
«Якутия» аиакомпания генеральнай дириэктэрэ Ольга Федорова үлэ көдьүүһүн үрдэтиигэ ананар үлэни сиһилии билиһиннэрдэ. Ол иһигэр барыһы аҕалбыт маршруттары тохтотуу, Москваҕа уонна Краснодарга баар базалар үлэлэрин тохтотуу туһунан эттэ.
Егор Борисов кылгас болдьох иһигэр өрөспүүбүлүкэ авиа тырааныспарын сайыннарыыга этиилэри бэлэмнииргэ сорудахтаата.
This post was published on 20.03.2016 16:47 16:47