Егор Борисов Арассыыйа официальнай делегациятын састаабыгар киирэн бүгүн, ахсынньы 14 күнүгэр Токиоҕа барда. Кини дойду президенэ Владимир Путин Японияҕа сырыытын чэрчитинэн ыытыллар тэрээһиннэргэ кыттар.
Арассыыйа-Япония икки ардыларыгар бизнес туһунан кэпсэтиһиилэр буолуохтара. Бу тэрээһин икки дойду хардарыта дьайсан сайдыыларыгар олугу ууруохтаах. Форумҥа Арассыыйа да, Япония да бөдөҥ компанияларын салайааччыларын ыҥырдылар. Манна доруобуйа харыстабылын, куорат эйгэтин сайыннарыы, үрдүк технологиялаах уонна экспорга анаммыт салаалары кооперациялааһын, Арассыыйа Уһук Илинин саҥардан сайыннарыы, бу икки дойдулар үгэскэ кубулуйбут дьыалаларын кэҥэтии, о.д.а. боппуруостары дьүүллэһиэхтэрэ.
Егор Борисов оҥорон таһарыы эбийиэктэригэр сылдьыа, инвестицияны тардарга, дьоҕус уонна орто бизнескэ үбүнэн-харчынан өйөбүлгэ анаммыт дьыалабыай көрсүһүүлэри ыытыа.
Быйыл балаҕан ыйыгар Илиҥи II-с экономическай форумҥа Ил Дархан Саха сирэ «Хоккайдо Корпорейшен Ко Лтд» компанияны кытта меморандумҥа илии баттаабыта.
Ону таһынан Петербургтааҕы экономическай форум чэрчитинэн бырабыыталыстыба аатыттан электроэниэргиэтикэ эйгэтигэр үлэлиир «Кавасаки Хэви Индастриз, Лтд.» уонна «Соджиц Корпорэйшн» тэрилтэлэри кытта хардарыта үлэлиир сөбүлэһии түһэрсиллибитэ.
