Ил Дархан Егор Борисов бэҕэһээ Санкт-Петербурдааҕы экономическай форумҥа “British Petroleum” хампаанньа бэрэсидьиэнин Роберт Дадлины кытары көрсөн кэпсэттэ.
Көрсүһүүгэ “British Petroleum” хампаанньа Арассыыйаҕа бэрэстэбиитэлистибэтин салайааччыта Дэвид Кэмпбелл, Саха сирин дэлэгээссийэтиттэн СӨ бырабыыталыстыбатын бэрэссэдээтэлэ Евгений Чекин, бастакы вице-премьер Михаил Осипов, Экономика миниистирэ Денис Белозеров, Саха сирин сайдыытын корпорациятын дириэктэрэ Петр Алексеев, Саха сирин РФ бэрэсидьиэнигэр бэрэстэбиитэлин солбуйааччы Юрий Кравцов сырыттылар.
Былырыын күһүн балаҕан ыйыгар Ил Дархан хампаанньа Арассыыйатааҕы бэрэстэбиитэлистибэтин кытары киэҥ киэлилээх кэпсэтии ыыппыта. Чуолаан өрөспүүбүлүкэ социальнай сайдыытыгар үлэлэһэргэ этии киллэрбитэ. Холобур, үөрэх эйгэтигэр Хотугулуу-Илиҥҥи федеральнай университет базатыгар анал бырагырааманан исписэлиистэри бэлэмнээһин туһунан кэпсэтии барбыта. Онон быйылгы көрсүһүүлэригэр ити кэпсэтиилэрин чиҥэтэн биэрдилэр.
Ыспыраапка: “British Petroleum” («Бритиш петролеум») – ньиэбинэн дьарыктанар аан дойдуга биллэр улахан хампаанньа. Билигин 70-тан тахса дойдуну кытары үлэлэһэр. Сылга 3,3 мөл. тонна баррель ньиэби хостуур. Ол иһигэр биһиги өрөспүүбүлүкэбитигэр эмиэ үлэлиир. Хампаанньа ньиэбинэн, гааһынан дьарыктанарын таһынан, энергетикаҕа үлэлэһэр.
Аграфена КУЗЬМИНА, edersaas.ru
Мария ВАСИЛЬЕВА хаартыскаҕа түһэриилэрэ.
