Саха сирин 2030 сылга диэри сайыннарыы стратегията экономиканы, гуманитарнай уонна социальнай хайысхалары түмүөҕэ. Бырагыраама докумуонун оҥоруу былааһы уонна бизнеһи эрэ буолбакка, уопсастыбаны сомоҕолуохтаах. Ити туһунан Саха сирин баһылыга Егор Борисов НКИК «Саха» ханаалыгар «Аһаҕас кэпсэтии» биэриитигэр от ыйын 26 күнүгэр эттэ.
«Дойду илиҥҥи өттүгэр Саха сирэ тутаах субъект. Ону бары билиннэллэр. Саха сирин суолтатын регион былааһын уоргана эрэ буолбакка, федеральнай киин эмиэ быһаарыахтаах. Мин дойду президенэ Владимир Путины кытта көрсөрбөр ити боппуруоһу ырыттыбыт. Онно РФ бырабыыталыстыбата Саха сирин 2030 сылга диэри болдьохтоох сайдыытын түстүүр стратегияны үөскэтиигэ, ол инникитин дьүүллэһиэҕэ диэн дуогабардастыбыт», — диэтэ Егор Борисов.
Ил Дархан бу улахан суолталаах докумуону оҥорууга үлэ көхтөөхтүк барарын ыйда. Бырагыраамаҕа экономическэй, гуманитарнай уонна социальнай хайысхалар блоктара бааллар. Маныаха тустаах концепция торумнаммыт. Исписийэлиистэр Саха сириттэн эрэ буолбакка, атын регион ааттаах-суоллаах научнай кииннэриттэн үлэлиэхтэрэ.
«Баайдаах сирбит маныаха ураты миэстэни ылар. Сир баайын хостооһуҥҥа билигин ситиһиллибит көрдөрүүнү үрдэтэр соруктаахпыт. Ону таһынан урукку өттүгэр болҕомто таһыгар хаалбыт хайысхалары өрө тутуохпут. Аҕыйах киһи дьоҕус оҥорон таһаарыыны үөскэтэр, тыа хаһаайыстыбатынан дьарыктанар, дьоҕус уонна орто бизнескэ үлэлиир. Бэйэбит дойдубут уратытын учуоттаан, олохтоох оҥорон таһаарыыны өйүүр кэм кэллэ», — диэн Егор Борисов стратегия сүрүн сыалын-соругун сүһэн ылан эттэ.
Биһиги уратыбыт туох-ханнык иннинэ инфраструктураҕа хаарчаҕы, ыраах сирдээхпитин-уоттаахпытын кытта ситимнээх. Мантан сылтаан өрөспүүбүлүкэ холобур, элбэх бөдөҥ тиэхиньикэни оҥорор кыаҕа суох. Онон, бэйэбит ураты, ханна да суох табаары оҥорон таһаарыыга дьулуһуохтаахпыт. Итинник санааны Ил Дархан эттэ.
«Бүгүн биһиги IT-технологияны, таҥастыыр, ювелирнай промышленноһы өйүүбүт. Биллэн турар, тиһэҕэр тиийэ быһаарыллыбатах кыһалҕалар суох буолбатахтар. Холобур, инфраструктура. Биһиэхэ суол суох. Аныгы инновационнай быһаарыыларга, технологияларга тирэҕирэн сыананы намтатар баҕалаахпыт. Ити боппуруос үчүгэйдик илдьиритиллэн толкуйданыахтаах уонна оҥоһуллар стратегияҕа киириэхтээх. Биһиги былааһы, бизнеһи эрэ буолбакка, уопсастыбаны түмэ тардыахтаахпыт», — диэтэ Саха сирин баһылыга.
