2016 сыл түмүгүнэн регионааҕы валовай бородуукта үрдээһинэ 1% итэҕэһэ суох буолуохтаах. Маннык соругу Егор Борисов өрөспүүбүлүкэ бырабыыталыстыбатын уонна тэрилтэлэр салайааччыларыгар туһаайан эттэ.
«Төһө да халбаҥнааһын баарын үрдүнэн, ааспыт сылы кытта тэҥнээтэххэ, сүрүн макроэкономическэй көрдөрүүлэр үрдээтилэр. Ити сыл бастакы аҥаарыгар ордук биллэр. Россия экономикатыгар ыарахаттар билигин да бааллар. Ол эрээри уопсайдык эттэххэ, биһиэхэ көрдөрүү өрө тахсыыта салҕанан барар», — диэн Егор Борисов бырабыыталыстыбаны уонна тэрилтэ салайааччыларын кытта көрсүһүүгэ эттэ.
Экономика көрдөрүүтэ сыл бүтүүтэ намтыан сөп: «2016 сылга ис валовай бородуукта үрдээһинин кыччаабыта 1% эбиэхтээхпит», — диир Ил Дархан.
Кини эппитинэн, сыл бастакы аҥаарыгар бюджеты толорууга куһаҕана суох кирбии ситиһиллибит. Ол курдук, бу кэмҥэ 102 млрд солк. кээмэйдээх үп-харчы киирбититтэн 56 млрд — регион тус дохуота. «Онон 2016 сыл барыта эриэ-дэхси, этэҥҥэ буолуо диир билиҥҥитэ эрдэ. Кэккэ ыарахаттар баар буолуохтара. Социальнай эбэһээтэлистибэлэри ситэри толоруохпут», — диэтэ кини.
2014 сылы кытта тэҥнээтэххэ, 2015 сыл түмүгүнэн регион валовай бородууктатын үрдээһинэ 1,6% этэ. Промышленнай оҥорон таһаарыы — на 2,5%, сүрүн хапытаалга инвестиция — 4% үрдээбит.
