Үөһээ Бүлүү улууһун Далыр нэһилиэгэр Көмүс күһүн бэлэхтэрэ оҕуруот аһын дьаарбаҥката тэрилиннэ. Күһүҥҥү киһи күлбүтүнэн диэн бэрт мындыр этии бу күҥҥэ ордук суолталанна.
Далырга ыытыллыбыт дьаарбаҥкаҕа оҕуруот аһын арааһа тэлгэннэ. Элбэх дьон болҕомтотун тарпыт Васильевтар бааһыналарыгар үүммүт сүүнэ улахан хортуоппуй буолла. Ыйааһына 2 киилэ 100 гр. Атыттартан уратытын иһин «Дьиктитик үүммүт үүнээйи» анал аакка тигистэ.
Анна уонна Петр Васильевтар алта хорсун хоодуот уоллаах эдэр ыал. Тыа ыалын сиэринэн, оҕуруот аһын үүннэрэллэр. Уолаттар дьиэ ис-тас үлэтигэр сыстаҕастар, ийэ-аҕа тутаах дьоно.
— Бааһынабыт сирэ мөлтөх буолан, хортуоппуй олох сатаан үүммэтэ. Санаабытын түһэрбэккэ сылын аайы олордооччубут. Онтон быйыл уолаттарбытынаан алта куулу хостоон, кыһынын тото-хана сиир хаһаастанныбыт диэн үөрэбит, — диир ыал ийэтэ Анна.
Васильевтар бу дьикти хортуоппуйдарын уура сыталлар, кэтээн көрөр былааннаахтар.
«Икки киилэттэн ордук ыйааһыннаах хортуоппуйу хаһан да көрө илик этибит. Уопсайынан оҕуруот аһын бары көрүҥэ быйыл хаһааҥҥытааҕар да бөдөҥ. Үгүспүт урукку дьыллардааҕар икки төгүл өлгөм үүнүүнү хомуйдубут«, — диэн олохтоохтор кэпсэтэллэр.
Ааптар: Валентина ДОГОЮСОВА, «Үөһээ Бүлүү» хаһыат, Ulus.Media сайт
