Өрөспүүбүлүкэтээҕи оҕо хамсааһынын бэстибээлигэр Үөһээ Бүлүүтээҕи «Тускул» оҕо киинин иһинэн үлэлиир «Сомоҕо» оҕо хамсааһына презентация быыстапкатыгар 3-с степеннээх лауреат аатын ылла, Ян Сидоров «Миниистир» күрэххэ кыттар сертификат тутта.
Салайааччылара Саргылана Ильина үөрүүлээх сонуну маннык кэпсээтэ:
— Социальнай бырайыагы көмүскээһиҥҥэ Кэнтик орто оскуолатын «Үрдэл» оҕо хамсааһынын лидерэ Айастаан Андреев «Я – творец добра» секцияҕа кыттан 2-с миэстэни ылла уонна «Океан» лааҕырга сынньанар путевканы бэлэх тутта. Онтон Ян Сидоров бастыҥ көхтөөх лидер быһыытынан бэлиэтэнэн, республикатааҕы «Министр» күрэххэ кыттар сертификат хаһаайынынан буолла. М.А. Алексеев аатынан Үөһээ Бүлүүтээҕи лицей-интернат «Эрэл» оҕо хамсааһынын бэрэссэдээтэлэ Юра Борисов СӨ биир кэлим оҕо хамсааһынын анал түөскэ кэтэр бэлиэни үрдүк сыанаттан ылан, үөрүүбүт үс бүк үрдээтэ. Маннык бэлиэҕэ өрөспүүбүлүкэ үрдүнэн биэс бастыҥ оҕо тигистэ. Маны тэҥэ Ян Сидоров уонна «Сомоҕо» бэрэссэдээтэлэ Юля Николаева Оҕо хамсааһынын Федерациятын Бочуотунай грамотатынан наҕараадаланнылар.
