Үөһээ Бүлүү улууһа төрүттэммитэ 85 сылыгар анаммыт өрөгөйдөөх «Күннэр» Дьокуускай куоракка салҕаналлар. Билигин улуус нэһилиэктэрин баһылыктара Ил Түмэн депутаттарын кытта мунньахтара буола турар.
Үөһээ Бүлүү улууһун депутаттарын Сэбиэтин бэрэссэдээтэлэ Николай Николаев салайааччылаах дэлэгээссийэ Ил Тумэн мунньахтыыр саалатыгар улуус сайдыытын боппуруостарыгар муһунна.
СӨ Судаарыстыбаннай мунньаҕын аграрнай политикаҕа сис кэмитиэт бэрэссэдээтэлэ Андрей Находкины уонна сир сыһыаннаһыыларыгар, экологияҕа, айылҕа ресурсаларыгар сис кэмитиэт бэрэссэдээтэлэ Владимир Прокопьев, Үөһээ Бүлүү уокуругуттан депутаттар Гаврил Алексеев, Феодосия Габышева кытталлар.
Тыа хаһаайыстыбатынан дьарыктанар улуус сүрүн боппуруостарын дьүүллэһэр мунньаҕы Феодосия Габышева ыытар.
Андрей Находкин үөһээ бүлүүлэр тыа хаһаайыстыбатыгар инники иһэр улуус буолалларын бэлиэтээтэ. «Куруук ураты санааны, толкуйу этэллэр, куруук сибээһи туталлар», — диэтэ кини.
Кэпсэтиини Балаҕаннаах баһылыга Степан Дмитриев саҕалаата.
Мунньах түмүгүнэн бииргэ үлэлииргэ тосхол ылыллара былааннанар.
