Үөһээ Бүлүү улууһугар от ыйын 25 күнүттэн саҕалаан, барыта 34 быыбардыыр учаастак үлэлиир. Олохтоохтор РФ Конституциятыгар уларыйыы, эбии киирэригэр олус эппиэтинэстээхтик сыһыаннаһаллар. Куоластааһын бастакы күнүттэн көхтөөхтүк ыытыллар.


Үөһээ Бүлүү улууһун киинигэр баар 76-с нүөмэрдээх учаастагар аҕыс киһи үлэлиир. Хамыыһыйа чилиэттэрэ, бастакы куоластыыр күн улууска ыһыах бырааһынньыгар сөп түбэспитинэн, бары сахалыы таҥастаах маанымсыйан кэлбиттэрэ. Онтон билигин кинилэр хас биирдиилэрэ дьэрэкээн оҕуруонан «УИК 76» диэн бэлиэ оҥостон, түөстэригэр иилинэн, куоластааччыларын үөрэ-көтө көрсөллөр.

Зоя Колосова, 76 нүөмэрдээх учаастак бэрэссэдээтэлэ: «Биһиэхэ уопсайа 700-тан тахса быыбардааччы испииһэккэ киирэ сылдьар. Биһиги учаастакпыт улахаҥҥа киирсэр, үгүстэрэ Бэрэ оройуонун олохтоохторо буолаллар. Кэтээн көрдөххө, биһиэхэ куруук быыбардыыр дьоммут кэлэн көхтөөхтүк кытталлар. Быйыл хаһааҥҥытааҕар да элбэх ыччат 18 сааһын туолан, аан бастакыларын куоластыыллар, кинилэри бэлиэтээтибит«.

Быйылгы тэрээһин уратыта — хаһааҥҥытааҕар да элбэх киһи дьиэтиттэн олорон куоластыырга сайаапка биэрбит, улуус үрдүнэн 2000-тан тахса киһи дьиэтигэр олорон куоластаата. Маны сэргэ, хамыыһыйа үлэһиттэрэ тэрилтэлэринэн сылдьан эмиэ үлэлээтилэр. Бэлиэтээн эттэххэ, Быракаан, Хомустаах, Далыр нэһилиэгин Күүлэт учаастагын уонна Мэйик Маай учаастагын олохтоохторо ким да иннинэ куоластаан, үрдүк көрдөрүүнү биэрдилэр.

Бу киэһэ 18 чаастааҕы дааннайынан испииһэккэ киирбит 11 296 киһиттэн 9501-рэ куоластааһыҥҥа кыттан, 84,11 бырыһыан буолла.

Сигэн:

2
0

Хоруй суох

Хоруйдаа

Лимит времени истёк. Пожалуйста, перезагрузите CAPTCHA.