Ааспыт нэдиэлэҕэ Дьокуускайга «Модун» спортивнай комплекска гиирэ спордун федерациятын кубогар хамаанданан күрэхтэһии буолла. Саха сирин 14 муннугуттан 150 быыппастыгас быччыҥнаах спортсмен кыттыыны ылла. Үөһээ Бүлүү чиэһин Николай Кардашевскай салайыытынан 19 спортсмен көмүскээтэ.


Үс күннээх улахан эрийсиилээх, ыһыылаах-хаһыылаах күрэх түмүгүнэн үөһээ бүлүүлэр кубок хаһаайыттарынан буоллулар! Аан дойду чөмпүйүөнэ, сахалартан бастакы норуоттар икки ардыларынааҕы кылаастаах спорт маастара Михаил Саввинов, РФ спордун маастара Никандр Тимофеев, бастакы разрядтаах Мичил Софронов кыһыл көмүһү ыллылар.

РФ спордун маастара Дмитрий Михалев, дьахталларга РФ спордун маастарыгар кандидат Марианна Ильина үрүҥ көмүс, СӨ спордун маастара Александр Данилов, иккис разрядтаах Василий Христофоров боруонса мэтээллэри түөстэригэр кылабачыттылар.

Бу күрэхтэһиигэ Михаил Саввинов биирдии илиитигэр 32-лээх гиирэлэри 101 быраҕан (толчок) Саха Сирин рекордун олохтоото! Онтон Дмитрий Михалев уһун циклга 32 киилэлэрдээх иккилии гиирэни 10 мүнүүтэҕэ 41 биирдэ өрө анньан, кыайыы өрөгөйүн биллэ. Санатан этэр буоллахха, Үөһээ Бүлүү гирэбииктэрэ Өрөспүүбүлүкэ федерациятын кубогын субуруччу бэһис төгүлүн кыайдылар!

Уопсай түмүккэ хамаанданан 30 очкуолаах Үөһээ Бүлүү бастакы миэстэҕэ, иккискэ 50 очкуолаах Чурапчы, Мэҥэ Хаҥалас улууһун хамаандата үһүс миэстэҕэ тигистилэр.

Ааптар: Валентина Догоюсова

0
0
comments powered by HyperComments