«Биир ньыгыл Россия» политическай партия ыам ыйын 22 күнүгэр ыытыллыахтаах норуот бүттүүн барыллаан куоластааһыныгар партия аатыттан РФ Государственнай Думатын саҥа састаабыгар киирэр депутакка кандидаттары талыахпыт.
Бүгүҥҥү күннээҕи иһитиннэриинэн 13 кандидат праймеризка кыттар баҕатын биллэрбит. Праймериз ыытыллар күнүгэр Саха сирин үрдүнэн 165 быыбардыыр учаастакка бүттүүн куоластааһыныгар ким баҕалаах кыттыыны ылыаҕа. Бүллүтүөнү толорууга кандидаттартан хас да киһиэхэ биирдэ куоласкын биэрэриҥ көҥүллэнэр. Куоластааһын кэннэ рейтинг ньыматынан үрдүк көрдөрүүлээх кандидаттары сүүмэрдээн ылыахтара, кинилэр күһүҥҥү быыбарга партия аатыттан бэйэлэрин кандидатураларын туруоралларыгар кыах бэриллиэҕэ.
Маныаха анаан муус устар 9 күнүгэр Үөһээ Бүлүү улууһун Үөһээ Бүлүү сэлиэнньэтигэр ыытыллыбыт дебакка регистрацияны ааспыт 13 кандидаттан үс киһи кэлэн кыттыыны ылла. Ол курдук, Дьокуускай куорат думатын депутата Владимир Аммосов, Ил Түмэн Государственнай мунньах депутата Александр Сусоев уонна «Саха сирэ» хаһыат кылаабынай редактора Чокуур Гаврильев иккилии мүнүүтэҕэ депутат үлэтигэр-хамнаһыгар сыһыаннаан бэйэлэрин санааларын этиннилэр. Депутат буолар түгэннэригэр ханнык хайысхаҕа чуолаан болҕомто ууруллуоҕун туһунан кэпсээтилэр. Оппоненнар өйүүр бөлөхтөрө хас биирдии кандидакка иккилии боппуруоһу биэрдилэр. Салгыы Үөһээ Бүлүү олохтоохторо бэйэлэрин ыйытыыларын биэрдилэр.
Дебат кэннэ кэпсэтиигэ бэрт элбэх дьон кытынна. Педагогическай наука доктора Василий Долгунов эдэр дьон быыбарга кыттыыны ылаары үлэлээн эрэллэрин көрөн биһириирин биллэрдэ. «Эһиги Госдумаҕа депутат буолар иһин охсуһаҕыт. 90-с сыллартан 25 сыл устатыгар фабрикалары, собуоттары, сиртэн хостонор баайы бүтүннүүтүн чааһынай бас билиигэ бэриллэн турар, күн-түүн сыана ыараан иһэр. Мин сүбэлиэм этэ, эһиги депутат буолуоххутун баҕарар буоллаххытына норуот баайын норуот туһугар ананарын туруорсар туһугар үлэлиэхтээххит. Оччоҕо норуот эһигини өйүө этэ» — диэн баҕа санаатын этиннэ. Сэргэх кэпсэтии түмүгэр Чокуур Гаврильев сахалыы таҥастаах кэлбитин Үөһээ Бүлүү улууһун дьаһалтатын дьыалаларын дьаһайааччы Спиридон Борбуев улуус аатыттан анал махталын биллэрдэ.
This post was published on 11.04.2016 11:45 11:45