Үөһээ Бүлүү нэһилиэгин оскуолаларын, болуоссаттарын, олорор дьиэлэрин эргин, суол быһа охсуһуутугар, дьон мустар сирдэригэр барыта 42 видеонан кэтээн көрүү камераларын туруордулар.
Үөһээ Бүлүү МТ баһылыга Максим Силигиянов видеонан кэтээн көрүү камералара нэһилиэккэ быраабы кэһии тахсыытын хонтуруоллууллар, бэрээдэги көрөр уорганнарга көмө буолаллар диир. Сыл саҕаланыыта биэс камера турбут. Ол кэннэ уулуссаҕа, дьон мустар сиригэр буруйу оҥоруу биллэ кыччаабытын кэпсиир баһылык.
IP-камералар -40 кыраадыстан +60 °C тиийэ үлэлиир кыахтаахтар. Видеотехниканы «Ростелеком» хампаанньа таҥан биэрбит.
