Үөһээ Бүлүүгэ уу хаачыстыбата элбэх дьону долгутар тыын боппуруос буолла. Өрүс киртийиитин түмүгэр дьон бу сайыҥҥаттан эбэ уутун иһэрин, туттарын дьиксинэр. Онтон билигин балаһыанньа хайдаҕый?
Нэһилиэнньэни ыраас уунан хааччыйыы туһунан Үөһээ Бүлүү сэлиэнньэтин баһылыга Максим Силигиянов маннык кэпсиир:
— Ууну үрэхтэн баһа сылдьыбыппыт да, халлаан тымныйан, уута тоҥон үрэхтэн ылыы тохтоото. Күн бүгүҥҥү туругунан бодобуостар ууну уу собуоруттан ылан нэһилиэнньэни хааччыйаллар. Уу собуора үрэх уутун 3 төгүл ыраастаан таһаарар. Билиҥҥи туругунан 15 бодобуос тигинэччи сүүрэ сылдьар.
— Онтон интэриниэт ситимигэр бодобуостар дьэбиннээх ууну куталлар диэн этэллэр дии. Маныаха туох диэн этиэххиний?
— Ити уу собуорун иһитэ (емкость) дьэбинирбититтэн буолар. Ол иһин кыра дьэбиннээх. Ол эрээри, бу уу Роспотребнадзор туох баар бэрэбиэркэтин ааһан, иһэргэ көҥүллээх. Онтон уу иһитин анал кырааска кэллэҕинэ, кырааскаланыллыахтаах. Маны сэргэ «АЛРОСА» хампаанньа уу собуорун оборудованиетын саҥардыыга (модернизация) уонна саҥа бодобуос биэрэргэ үлэтин ыыта олорор.
— Онтон дьэ муус ылыыта саҕаланан эрэр, мууһу хантан ылыахтарай?
— Өрүс мууһа турдаҕына анаалыстаан көрүөхпүт. Анаалыс үчүгэй буоллаҕына, өрүстэн мууһу ыларга көҥүл биэриэхпит. Өскөтүн, өрүс мууһун анаалыһа иһэргэ көҥүллэммэт буоллаҕына, чугастааҕы күөллэртэн муус ылары ситиһиэхпит.
— Ыраас уунан хааччыйар тэрилтэлэр үлэлэрэ хайдаҕый?
— Сэлиэнньэбитигэр ыраас уунан дьарыктанар үс тэрилтэ баар. «Хотун Бүлүү» тэрилтэ ууну дьиэҕэ тириэрдэр өҥөлөөх эрээри, сакаас элбэҕинэн ситэ хааччыйбакка олорор. Онтон «Үс кут» уонна «Ыраас уу» тэрилтэлэрэ аадырыска тириэрдибэттэр, дьон бэйэтэ баран атыылаһар.
Нэһилиэнньэ уу кыһалҕатын наһаа баһааҕырдан, дьону аймыыр, куттуур наадата суоҕун өйдүөх тустаах. Дьон ыраас уунан хааччылларыгар тустаах үлэһиттэр сөптөөх үлэни ыыта олороллор.
Ааптар: Валентина Догоюсова, «Үөһээ Бүлүү» хаһыат
