Кулун тутар 28 күнүгэр улуус баһылыгын планеркатыгар, ааспыт нэдиэлэ бээтинсэтигэр түспүт күүстээх тыал улуус объектарыгар таһаарбыт хоромньутун туһунан промышленность, тутуу уонна инфраструктураны сайыннарыы управлениетын салайааччыта Александр Типанов кэпсээтэ.
Кулун тутар 25 күнэ үүнэр түүнүгэр түспүт күүстээх тыал И.Н. Барахов аатынан 1 нүөмэрдээх оскуола сарайын арҕаа салаатын хастыы тардан көтүппүтэ. Бу туһунан анал хамыыһыйа акт толорон, сарайы чөлүгэр түһэриигэ 2 мөл. солк. ирдэнэрин быһаарбыт. Маны таһынан, күүстээх тыалтан Хоро нэһилиэгин спортивнай саалатын сарайа иккис төгүлүн «көттө». Тыала, тибиитэ бэрт буолан, ол күн хамыыһыйа бу нэһилиэккэ тахсыбатах. Хоромньу кээмэйэ бүгүн быһаарыллыаҕа.
1 нүөмэрдээх оскуола директора Анатолий Захаров: «Саахалтан тахсыбыт ыһыллыыны-тоҕуллууну сарсыныгар барытын хомуйан-дьаһайан бүтэрбиппит. Ыйыллыбыт 2 мөлүйүөн солкуобай үбү суһаллык тыыран, сарайы чөлүгэр түһэрии үлэтэ муус устар бүтэһигэр диэри түмүктэнэрэ буоллар диэн баҕа санаалаахпын. Онуоха диэри өрөмүөн түмүктэммэтэҕинэ, ардахтан штукатуркабыт илийэн, алдьанан, өссө улахан ороскуокка тэбиллэр кутталлаахпыт».
Кэпсэтиини истэн олорбут баһылык солбуйааччыта Андрей Неустроев төһө да кырыымчык буоллар, бу нэдиэлэттэн бэдэрээччити быһааран, үлэ саҕаланыаҕа диэн хоруйдаата.
