Бүгүн, сэтинньи 27 күнүгэр М.А.Алексеев аатынан Үөһээ Бүлүүтээҕи өрөспүүбүлүкэтээҕи лиссиэй-интэринээккэ норуот маастара Кирилл Никифоров – Лөкөчөөн төрөөбүтэ 80 сааһыгар анаммыт тэрээһин буолла. «Олоҥхоҕо киһи анала» сахалыы уонна английскайдыы тылларынан билим практическай кэмпириэнсийэ төрдүс төгүлүн ыытылынна.
«Душа России» бириэмийэ лауреата, СӨ Ытык сүбэтин бочуоттаах кырдьаҕаһа, СӨ култууратын үтүөлээх үлэһитэ, спорт бэтэрээнэ, олоҥхоһут, алгысчыт Кирилл Никифоров — Лөкөчөөҥҥө анаммыт Олоҥхо күнүгэр 40-тан тахса оҕо кытынна. Бүлүү улууһун Лөкөчөөн нэһилиэгиттэн кытта кэлбиттэрэ кэрэхсэбиллээх. Кэмпириэнсийэ уратыта – оҕолор дакылааттарын икки тылынан, сахалыы уонна английскайдыы ааҕаллар.
Татьяна Никифорова, саха тылын уонна литературатын учуутала, кыыһа:
— Сайдыы, мин санаабар, тылтан саҕаланар. Биһиэхэ, сахаларга, тыл ааммыт, суолбут кэриэтэ. Ол тылбыт баайа олоҥхоҕо сытар. Дьон олоҥхону ааҕарын наһаа ыарырҕатар. Дьиҥэр, олоҥхону аахтаххына саха толкуйа киирэр эбит. Сахалыы толкуй киирдэҕинэ олоҕу атыннык көрөҕүн, ураты буолаҕын. Аныгы оҕоҕо олоҥхону үөрэтии олус наада.
Саина Егорова, Нам орто оскуолатын 9 кылааһын үөрэнээччитэ:
— Александров Никита олоҥхотуттан «Олоҥхоҕо Үөһээ Бүлүү сирэ-уота» дакылааты көмүскээтим. Бу олоҥхоҕо Үөһээ Бүлүүгэ сыһыаннаах тыллар киирбиттэр эбит, холобур, Үөдүгэй, мэҥэдьэктэр уо.д.а. Олоҥхоҕо айылҕаны харыстааҥ, алдьатымаҥ диэн элбэхтик этиллибит. Ону ааҕан бараммын элбэҕи өйдөөтүм. Олоҥхону оҕолор үөрэтэрбит, билэрбит наада, манна история барыта киирэр.
Ааптар: Мария ВАСИЛЬЕВА
This post was published on 28.11.2018 10:14 10:14