Өрөспүүбүлүкэ таһымнаах сүдү суолталаах тэрээһини Олоҥхо ассоциацията, ХИФУ олоҥхону чинчийэр института, «Төрүт тыл» уопсастыба уонна Үөһээ Бүлүү оройуонун уонна сэлиэнньэтин дьаһалталара ыыттылар. Ыҥырыылаах ыалдьыттарынан филологическай наука кандидата Михаил Алексеев – Дапсы, ХИФУ профессордара, филологическай наука доктордара Гаврил Филиппов, Иван Алексеев – Хомус Уйбаан о.д.а. буоллулар. Уопсайа 600-чэкэ оҕо-аймах, сахалыы куттаах олоҥхону сэҥээрээччи кыттыыны ылла.
Балаһыанньа быһыытынан 14 олукка арахсан, уопсайа 253 дириҥ хорутуулаах дакылаат ааҕылынна. Сахабыт сирин улуустарыттан учууталлар эрдэттэн бэлэмэнэн, тэринэн кэлэн, 17 учуутал 14 аһаҕас уруогу ыытта. Учуонайдар этэллэринэн, олоҥхоҕо араас наука хабыллар. Ол курдук, химия, физика, математика уруоктарыгар тиийэ олоҥхо тематынан уруок сыала-соруга ситиһиллэрин туоһулаатылар. Билиҥҥи учуутал хайдах курдук туттан-хаптан, саҥаран-иҥэрэн, араас инновационнай технологияны туһанан үлэлиирин дириҥ ис хоһоонноох уруоктары көрбүт эрэ дьон сөхтө-махтайда.
Форум устата «Сатабыл» быыстапка-дьаарбаҥка тилэри үлэлээтэ. Араас улуустартан ыалдьыттыы кэлбит маастардар хас да сааланан баппат элбэх оҥоһуктара дьон-сэргэ болҕомтотун тарта. «Аал-луук мас» устуудьуйа салайааччыта маастар-кылаас ыытта.
Үөһээ Бүлүү киэн туттар тойуксута, оһуохайдьыта, Кэнтиктээҕи орто оскуола иһинэн тэриллибит Олоҥхо лааҕырын, «Кылыһах» бөлөх салайааччыта, Россиятааҕы «Эбии үөрэхтээһин бастыҥ үлэһитэ» куонкурус кыайыылааҕа Айталина Мойтохонова-Сахаайта 14 оскуола саастаах оҕону уонна 54 ыччаты кытыннаран ыыппыт тэрээһинэ, чахчы кыахтаах, ураты талааннаах салайааччы буоларын туоһулаата.
