Быйылгы үөрэх дьылын көрсө Үөһээ Бүлүүтээҕи «Тускул» оҕо сайдар киинэ номнуо биллэр «Үрүйэчээн», «Сиэйээнэ», «Оһуор», «Нарыйа», «Сомоҕо», «Волонтер» түмсүүлэри кытта сэргэ, буруолуу сылдьар сабыс-саҥа куруһуоктары арыйан үлэтин саҕалаата.
Куруһуоктарга эдэр эрчимнээх, ол эрэн номнуо эбии үөрэхтээһиҥҥэ, оҕолору кытта алтыһарга уопуттаах, бэйэлэрин үлэлэрин толору баһылаабыт, эргиччи талааннаах педагогтар үлэлииллэр.
Бу туһунан куруһуоктар салайааччылара Андрей Алексеев маннык кэпсиир:
— Аан дойдуну тэлэһийэ көтөн, араас омук дьонун-сэргэтин кытта алтыһан, билиитин-көрүүтүн хаҥатыан баҕалаахтарга омук тылынан көҥүллүк саҥарарга үөрэтэр «JustSpeak» куруһуок арылынна. Маны сэргэ, араадьыйа уонна тэлэбиидэнньэ алыптаах эйгэтин арыйан, инникитин бу хайысхаҕа үлэлиэн-хамныан баҕалаахтарга «Shine», доруобуйаларынан хааччахтаах оҕолорго уонна кинилэр төрөппүтэригэр «Өйөбүл» куруһуоктар үлэлиэхтэрэ. Бу сонун куруһуок сыала-соруга — айылҕаттан бэриллибит талааны арыйан, илиинэн оҥоһук арааһын айан таһаарыахтара, сүбэ-ама, өйөбүл ылыахтара. Онтон улууһун, өрөспүүбүлүкэтин кэскилин туһугар кыһаллар, сырдыкка талаһар, дьону тумэр дьоҕурун сайыннарыан баҕалаах оҕолорго «Лидер» куруһуок айымньылаах үлэтин саҕалаата.
Оҕо үөрэх таһынан куруһуокка сылдьара олус наада. Эбии дьарыктарга сылдьан, кистэлэҥ талаана арылларыгар, олох тэтиминэн сайдарыгар эбии үөрэхтээһин төһүү күүс буолара саарбаҕа суох.
Ааптар: Валентина ДОГОЮСОВА, «Үөһээ Бүлүү» хаһыат, Ulus.Media сайт.
This post was published on 13.09.2018 11:16 11:16