Саха народнай поэта, суруналыыс, учуутал, публицист, отучча кинигэ ааптара Василий Тарасович Сивцев үбүлүөйдээх 85 сааһын көрсө төрөөбүт Үөһээ Бүлүү улууһугар икки кинигэтин сүрэхтэниитэ буолла. «Бичик» кыһаҕа бэчээттэнэн тахсыбыт «Дьоллоох тыл буолан» кинигэҕэ хаһыакка суруйбут ыстатыйалара уонна ахтыылара киирдилэр. Иккис сүрэхтэнэр кинигэ аата «Буор куттаах ньургуһун» диэн. Манна кэлиҥҥи сылларга суруллубут хоһоонноро бэчээттэммиттэр.
Истиҥ көрсүһүүгэ алгысчыт, тойуксут Николай Корякин-Уран Ньукулай, суруйааччы, поэт Василий Харлампьев-Хара Лааҥкы, суруналыыс, Үөдүгэй нэһилиэгин баһылыга Валерий Васильев, уопсастыбаннас кытыннылар. Аҕа саастаах ытык дьон Василий Тарасович төрдүн-ууһун туһунан кэпсээтилэр, кини хомоҕой тыллаах хоһоонньут буоларын өссө төгүл бэлиэтээтилэр. Поэт хоһооннорун «Санаа ситимэ» бөлөх кыттааччылара ааҕан тэрээһини киэргэттилэр.
«Мин Үөһээ Бүлүү улууһун түөрт народнай суруйааччыларын кытта алтыспыт дьоллоохпун. Василий Тарасовиһы «үрүҥ санаа поэта» диэн ааттыыллар. Кини олус элбэх сонет ааптара», — диэн поэт Хара Лааҥкы санаатын эттэ.
Ааптар: Мария Васильева
This post was published on 19.12.2018 16:59 16:59