Улуус киинин 11 маҕаһыынын бэрэбиэркэлээһин түмүгэр 4 маҕаһыыҥҥа итирдэр утахтары атыылааһын тохтотулунна. Бу туһунан Үөдүгэй, Кэнтик нэһилиэктэригэр, Үөһээ Бүлүү сэлиэнньэтин «Бэрэ» түөлбэтигэр уонна Куду учаастагар бэрээдэги көрөөччү, дьон-сэргэ нус-хас олоҕун араҥаччылааччы эдэр үлэһит Борис Эрдынеев кэпсиир. Кини территорияларыгар арыгы атыытын хаарчахтарын кэһиини, сокуоннайа суох атыылааһыны тохтотууга күүскэ ылсан үлэлээн эрэр.
— «Интайм» маҕаһыын арыгы атыылыыр лицензията дьиҥэ суоҕа биллэн, биир холуобунай уонна биир административнай дьыала тэриллэн, билигин барыллааһын бэрэбиэркэ бара турар. Уопсайа улахан кыраадыстаах итирдэр утах 150-ча лиитэрэ кэриҥэ, ону таһынан 150 л кыра кыраадыстаах аһыы утах, ол эбэтэр пиибэ былдьаммыта. Үөдүгэй нэһилиэгин депутаттара арыгы атыылыыр маҕаһыынтан сынньалаҥ, үөрэх тэрилтэлэригэр диэри ылыммыт 300 м иһигэр хабыллар «Рита» маҕаһыын, Үөдүгэйдээҕи сынньалаҥ кииниттэн отой чугас турар буолан, эмиэ арыгы атыылыыра бобулунна. Маны таһынан «Билиилээх» территориятыгар турар «Мааппа» маҕаһыын филиалын үлэһиттэрэ икки төгүллээн арыгы атыылааһыныгар сокуонунан ыйыллыбыт бириэмэни тутуспатахтара биллэн, 5 тыһ. солк. суумаҕа ыстарааптанан тураллар. Маныаха маҕаһыыны бас билээччи үлэһиттэригэр сокуону кэһиини тутуһарын туһунан илии баттааһыннаах эрдэ сэрэтии үлэтин ыыппытынан, эппиэккэ тардыллыбатаҕа. Онон улуус киинигэр арыгыны 10 маҕаһыын көҥүллээх атыылыы турбут эбит буоллаҕына, түөрт маҕаһыыҥҥа билигин эргиниилэрэ хаарчахтанна. Оттон «Сова» маҕаһыын икки дьиэтэ лицензията суох буолан, атыылыыр бырааба төрдүттэн суох, — диэн участковай Борис Викторович кэпсээтэ.
Саҥа сокуон киириэҕиттэн арыгы атыылааһыныгар хаарчахтар киирбиттэрэ. Манна маҕаһыын оҕо, үөрэх, балыыһа тэрилтэлэриттэн, дьон-сэргэ тоҕуоруһа мустар култуурунай-маассабай тэрээһиннэр ыытыллар сирдэриттэн, кулууп дьиэлэрин территорияларыттан 260 м ыраах туруохтаах диэн Үөһээ Бүлүү сэлиэнньэтин депутаттарын Сэбиэтинэн быһыллан турар. Олунньу 24 күнүнээҕи сессия түмүгүнэн бу кээмэйи 500 м диэри ыраахха быһарга депутаттар 100% куоластаатылар. Онон сотору кэминэн сорох-сорох маҕаһыыннар итирдэр утаҕынан эргиниилэрэ эмиэ тохтуурун күүтэбит.
Арыгы атыылыыр маҕаһыын 21 нэһилиэктэн Хоро нэһилиэгэр эрэ үлэлии турар. Онтон атын нэһилиэктэргэ олохтоохтор дьаһалтаны кытары тэрийбит мунньахтарын түмүгэр, куоластааһын быһаарыытынан булгуччулаахтык бобуллан турар.
