Муус устар 15 күнүгэр көрү-нары көҕүлүттэн тутар дьон улуустааҕы күрэхтэрэ П.Тобуруокап аатынан культура киинигэр буолан ааста. Суол-иис алдьанан, сорох кыттааччылар кыайан кэлбэккэ хааллылар, ол да буоллар, киэһэ өттүгэр кыайыылаахтар кыттыылаах улахан гала-концертка бастыҥтан бастыҥ нүөмэрдэр сыанаҕа тахсаннар, көрдөөх дьоннор көрдөрүн бэлэхтээн, көрбүт эрэ бары сүргэтэ көтөҕүлүннэ.
“Олоҥхо” народнай театрын салайааччыта Татьяна Семеновна Борисова театр аатыттан кыттыбыт Үөдүгэй нэһилиэгиттэн Василий Егоровка, Үөһээ Бүлүүттэн Маша Распутинаны пародиялаабыт Лия Федотоваҕа биһирэбил бириистэрин туттарда. Ону таһынан бастыҥ дьахтар оруолун иһин “Күндү күлүүк” анал аат эмиэ Лия Федотоваҕа ананна. Бастыҥ эр киһи оруолун иһин “Көрүдьүөһү күөртээччи” аат Оҥхойтон Альберт Ильиҥҥэ тигистэ.
Дүллүкүтээҕи оҕо саад үлэһиттэрэ “Дьээбэрэҥкэ” коллективын артыыската Елена Афанасьева Эдьиий Марыынаны пародиялаабытын иһин “Күрэх арыйыыта” анал ааты ылла. Оттон бу бөлөх салайааччыта Людмила Дорофеева “Бастыҥ салайааччы” аатынан бэлиэтэннэ.
Дүллүкүттэн Зинаида Романьятова салайааччылаах “Куо-мэтэкэлэр” өрөгөйдүүр күннэрэ үүннэ. Ол курдук, “Көрдөөх үҥкүүһүттэр” номинацияны, салайааччылара “Көрүдьүөһү күөдьүтээччи” анал ааты уонна коллектив “Көрдөөх дьоннор көрдөрө” күрэх Гран-при хаһаайкаларынан буоллулар. Кинилэргэ анал бириис быһыытынан ССРС киномотографиятын, СР культуратын туйгуна, Үөһэ Бүлүүтээҕи “Олоҥхо” народнай театрын артыыһа Алексей Казаков анал бирииһин – оҕолоро уонна аймахтара туруорбут 6 тыһыынча солкуобай суумалаах сертификаты бэлэх туттулар. Кинилэр олус көрдөөх сценкаларынан дьон биһирэбилин ылыахтарын ыллылар.
Хомустаах нэһилиэгиттэн “Айылгы” театральнай коллектив бастакы миэстэни ылла. Дьокуускайга ыытыллыбыт “Дьээбэрэҥкэҕэ” уонна Мэҥэ-Хаҥаласка “Сааскы сирэйдэр” көр-күлүү куонкурустарыгар ситиһиилээхтик кыттан кэлбит Оҥхой нэһилиэгин “Күллэринньик” көр-күлүү коллектива иккис миэстэ буолла. Үөдүгэй нэһилиэгин “Маркизалар уонна уоллар”бөлөх үһүс бириистээх миэстэҕэ тигистэ. Онтон бу коллектив артыыската Агафья Павлова “Көрөөччүлэр биһирэбиллэрэ” анал аат хаһаайкатынан буолла.
Быйылгы “Сааскы сирэйдэр” куонкурус Гран-при үрдүк аатын ылбыт Хоротооҕу “Хоросоо” көр-күлүү мини-театра ыалдьыт быһыытынан кыттан, бэйэлэрин бастыҥ нүөмэрдэрин бэлэх ууннулар.
“Балаҕаннаах бэтиэхэлэрэ” народнай театр бу кэмҥэ Дьокуускай куоракка А.Е.Кулаковскай аатынан норуоттар доҕордоһууларын дьиэтин информация-маркетинг салаата тэрийэн ыыппыт норуот тылынан уус-уран айымньытын фестивалыгар кыттыыны ыллылар уонна “Бастыҥ сценическай таҥас” анал ааты сүктүлэр.
