И.Н.Барахов аатынан 1 №-дээх орто оскуолаҕа 2016-2017 үөрэх дьылыгар 8-старга «а» уолаттар уонна «б» кыргыттар кылаастарын таһынан «в» кылаас физико-технологическай хайысханан арыллан үлэлиэҕэ.
Маныаха бу хайысхаҕа киирэр точнай наука предметтэригэр дьоҕурдаах, олимпиадаларга, НПК-ларга үчүгэй көрдөрүүлээх оҕолор киирдилэр. Кылааска 8 кыыс, 9 уол үөрэниэҕэ, салайааччынан Антонина Хобусарова, кураторынан Асемгуль Молорова ананнылар.
«Ыам ыйын 29-30 күннэригэр ХИФУ-тан преподавателлэр кэлэн учууталлары уонна үөрэнээччилэри кытары бастакы көрсүһүүлэрин тэрийиэхтэрэ. Саҥа үөрэх дьылыгар ылыллар былааны билиһиннэриэхтэрэ, үлэ хаамыытын торумнуохтара. Үөрэх чааһын этэр буоллахха, былаан быһаччы ХИФУ-ы кытта сөбүлэҥинэн оҥоһуллар. Хас чиэппэри түмүктүүр хонтуруолунай үлэлэр ХИФУ-тан оҥоһуллан кэлиэхтэрэ. Физико-технологическай хайысхаҕа дьоҕурдаах оҕолору сайыннаран, оскуоланы бүтэрэллэригэр быһаччы ХИФУ-га киирэллэригэр бэлэмнээһин, үрдүк үөрэх кыһатын бүтэрэн баран дойдуларыгар, Үөһээ Бүлүүгэ, үлэлии кэлэр ыччат тахсарын ситиһэр үлэ буолуохтаах» — диэн директоры үөрэх чааһыгар солбуйааччы Вера Николаева кэпсээтэ.
ХИФУ оҥорбут балаһыанньатыгар олоҕуран, И.Барахов аатынан оскуола докумуон бэлэмнээн, «ХИФУ үөрэхтээһин уокуруга» Ассоциацияҕа киирбитин туһунан туоһулуур сертификат туппутун түмүгэр маннык хайысхалаах кылаас үлэтин саҕалыыр буолла. Маныаха бу сонун сүүрээн олоххо киириэн иннинэ оскуола ХИФУ-ны кытта быһаччы ситимнээхтик үлэлээбиттэрэ номнуо иккис сыллара. Ол үлэ чэрчитинэн икки сыл устата ХИФУ-лар «обмен студентами» программанан Саха сиригэр үөрэнэ кэлбит омук устудьуоннарын 3-5 күҥҥэ Үөһээ Бүлүүгэ ыҥыран үлэлэтэллэр. Омук тылын илдьэ сылдьар устудьуоннары (носители языка), И.Барахов аатынан оскуолаҕа ыҥыран оҕолору кытары алтыһыннаран, уруоктарга сырытыннаран, омук тылын кытары быһаччы ситим олохтуурга бары усулуобуйаны тэрийэн үлэлэтэллэр. Бу устудьуоннар кэлэн үлэлиир күннэригэр омук тылыгар үөрэниэн баҕалаах оҕолор толору күнү омук тылын эрэ уруогар үөрэнэллэр. Маннык дьайыы саха оҕотугар олус туһалааҕын, оҕо устудьуоннуу барарыгар, тас дойдуга тахсарыгар улахан көмө буолуоҕун бу үлэни сүрүннүүр омук тылын учууталларын методическай холбоһуктарын салайааччыта Галина Петровна Жендринская мэктиэлиир.
Оттон бу дириҥ хорутуулаах үлэ барыта бииргэ түмүллэн, оскуола иһинэн ылыныллыбыт «Одаренные дети» диэн саха тылын уонна литературатын учуутала Алевтина Ивановна Николашкина салайааччылаах программаҕа тирэҕирэн үлэлиир.
