Муус устар 11 күнүгэр Үөһээ Бүлүү сэлиэнньэтин «Үһүс Билиилээх» территориятыгар таас варианынан 240 миэстэлээх, 3 этээстээх, ол эбэтэр 3000 кв. м. тахса иэннээх оҕо саадын дьиэтин бастакы сыбаайатын түһэрии үөрүүлээх түгэнэ үүннэ. Улууска өссө биир социальнай объект тутуллар буолбутун олохтоохтор сэргииллэр.
Улуус сыллата улаатар. Үөһээ Бүлүү бөһүөлэгэ уонна Үөдугэй нэһилиэктэрэ холбоон 10 тыһыынчаттан тахса нэһилиэнньэлээхтэр. Манна тоҕус оҕо саада баарын үрдүнэн наадыйааччы уочарата билигин да уһун-киэҥ. Үөһээ Бүлүү сэлиэнньэтин киинигэр 240 миэстэлээх, итиэннэ Андреевскай бөһүөлэгэр 140 миэстэлээх дьыссааттары таас варианынан тутууну туруорсар улэни өссө үс сыл анараа өттүгэр улуус баһылыга Владимир Поскачин саҕалаабыта. Нэһилиэнньэҕэ чахчы наадалаах этиини СӨ Ил Дархана Егор Борисов өйөөбүтэ.
Тутуу «судаарыстыба-чааһынай бииргэ үлэлээһин» бырагырааматынан саҕаланна. Сакаасчытынан «СахаАльянсСтрой» ХЭТ, сүрүн бэдэрээччитинэн «СахаМодульСтрой» ХЭТ талыллыбыттара, бэдэрээччит «ДекАрт» ХЭТ. Тутуу былаан быһыытынан бу сыл 1 кыбаарталыгар саҕаланна итиэннэ 2017 сыл 2 кыбаарталыгар түмүктэнэн үлэҕэ киириэхтээх.
Үөһээ Бүлүү улууһун үөрэх салаатын салайааччыта Александр Поскачин маннык эттэ:
— Бу кэннэ Андреевскай бөһүөлэгэр 140 миэстэлээх оҕо саада тутуллуохтаах. Ордук тыа сиригэр оҕо тэрилтэлэрин материальнай-техническай базалара олус эргэрдилэр. 2015 с. Россия Президенэ Владимир Путин 3-тэн 7 сааһыгар диэри оҕолору дьыссаатынан хааччыйыахтааххыт диэн дьаһалыгар олоҕуран, өрөспүүбүлүкэҕэ үлэ күүскэ бара турар. Ол эрэн билигин аны 2018 с. диэри 2,5 сааһыттан 7 сааһыгар диэри саастаах оҕону уһуйааннарынан хабыахтааххыт диэн сорук турда. Онон оҕустахха, Үөһээ Бүлүү улууһугар балаһыанньа син-биир уустук. Оҕо төрөөһүнэ эбиллэ турар. Онон улахан оҕо саадтара өссө да элбэхтик тутуллуохтарын наада. Оччоҕо эрэ бу уустук быһыы-майгы быһаарыллар кыахтаныаҕа.
1 №-дээх «Ньургуһун» оҕо саада бу тутуллан эрэр саҥа дьиэҕэ көһөн кэлиэхтээх. Сэбиэдиссэй Маргарита Григорьева манныгы бэлиэтээтэ:
— Биһиги бу тутууну 1987 сылтан кэтэһэбит. Ол саҕана 1 №-дээх оҕо саадыгар анаан 140 миэстэлээх дьиэ сыбаайата түспүтэ эрээри, тутуллан иһэн, үп-харчы кириисиһигэр ыктаран тохтоон хаалбыта. Онон күн бүгүн бу тутуубут сөргүтүллэн, өссө баараҕай хабааннанан эрэриттэн биһиги истиҥ махталбытын өрөспүүбүлүкэ, улуус салалтатыгар ис сүрэхпититтэн тириэрдэбит!
