Эдьигээннэр Николай Шемяков 105 сааһыгар испиктээх туруордулар  уонна кинигэ таһаардылар

Стахановец-булчут, ССРС Верховнай Сэбиэтин икки төгүллээх дьокутаата Николай Васильевич Шемяков быйыл 105 сааһын туолуо этэ. Кини сэрии ыар сылларын киллэрэн туран, 14 сыл устата төрөөбүт оройуонун салайбыта. Эдьигээн оройуона эбэҥки национальнай статуһу ылбытын алтыһыннара бу ытыктыыр киһилэрин кэриэһин санатар икки тэрээһин дьон болҕомтотугар таҕыста.


Эдьигээннэр ытыктыыр, сүгүрүйэр киһилэрэ Николай Шемякин төрөөбүтэ 105 сылын бэлиэтээтилэр. Үбүлүөй чэрчитинэн “Барҕа баайтан сомсо” кинигэ сүрэхтэниитэ буолла. Маны ааптар Мария Шадрина  Николай Васильевич бэйэтэ суруйан хаалларбыт “Мин үлэм опыттара” кинигэтигэр анаата.  1939 сыллаахха суруллубут уонна  бэчээттэммит брошюра  хабааннаах таһаарыыны Мария Ивановна республика киин библиотекаттан хас да сыл устата көрдөөн булбута. Онтун  саха аныгы алфавитыгар таһааран, киирии тылыгар быһааран  ааҕааччыларга  тиэртэ.

Кинигэ сүрэхтэниитигэр элбэх киһи сырытта. “Булт ньымаларын, бултанар кыыллар  дьыл кэмнэригэр  хайдах уларыйар майгыларын туһунан суруйан хаалларбыта аныгы да булчукка  олус туһалаах буолсу. Бэйэтэ булт энциклопедиятын курдук,” — диэн мустубут  дьон сыаналаатылар.

Иккиһэ — сэтинньи 30 күнүгэр “Тайахтаах сулуһум анныгар” диэн испиктээх улахан сэҥээриини, биһирэбили ылла. Бу туруоруу дьон билиитигэр аан бастаан 2013 сыллаахха режиссер Туйаара Егорова туруоруутунан тахсыбыта. “Шемяков Н.В. 100 сааһын туолуутугар, биир да кини уобараһын арыйар уус-уран айымньы суоҕуттан соһуйа санаабыттааҕым. Итиэннэ сүбэлэһэн баран, култуура үлэһиттэрэ драматург Семен Ермолаев-Сиэни  кытта кэпсэтиһэн, олохтоох сыанаҕа көрдөрөрбүтүгэр анаан оонньуу сценарийын суруйарыгар көрдөспүппүт. Семен Нифонтович Шемяков туһунан биһиги оройуоммутугар тахсыбыт кинигэлэри барытын сирийэн аахпыта, бииргэ алтыспыт сорох дьону кытта кэпсэппитэ олус туһалаабыта”,- диэн кэпсиир Туйаара Владимировна.

Ити кэнниттэн Саха театрын директора Анатолий Николаев бэйэтинэн Эдьигээҥҥэ кэлэн туруоруутунан, кини сүбэтинэн-аматынан бу айымньы өссө көҥүл тыыннанан, Саха театрын сыанатыгар уонна Чурапчы көрөөччүлэригэр тиэрдиллибитэ, улахан сэҥээриини ылбыта. Бу ааспыт биэс сыл устата Николай Васильевич кыра эрдэҕинээҕитин Саарын Егоров, орто сааһын — Владимир Иванов, кырдьар сааһын — Михаил Ефимов уларыйбакка оонньоотулар, бэйэлэрин дьоруойдарын ис дьиҥин ситэри-хотору арыйдылар. Ону сэргэ айымньы быйылгы туруоруллуутугар оруолларга Варвара Васильева, Саргылана Ксенофонтова, Юрий Максимов, Айаал Софронов, Туйаара Егорова, Анатолий Егоров, маассабай көстүүлэргэ “Оһуор” эбээлэр түмсүүлэрин, “Һохто” ансаамбыл кыттааччылара таҕыстылар.

Ааптар: Акулина ХАРБАЕВА, «Эдьигээн сонуннара» хаһыат

This post was published on 07.12.2018 13:14 13:14