19 Кулун тутар 19.03
  • -11°
  • $ 91,98
  • 100,24

Эдьигээҥҥэ ыты көлүнэр киһи баар

16:20, 13 декабря 2018
Текст:
Читайте нас на
Яндекс Новости
ЯДВ

Эдьигээн нэһилиэгэр 74 саастаах Владимир Васильев ыты көлүнэрин биир дойдулаахтара сөҕө-махтайа көрөллөр. Кини ытын көлүнэн айаннаан иһэр хаартыската Ватсап ситиминэн тарҕаммыта. «Эдьигээн сонуннара» хаһыат кэрэспэдьиэнэ кинини кытта көрсөн кэпсэттэ. 


74 саастаах, Эдьигээн нэһилиэгин олохтооҕо Владимир Васильев түөрт атахтаах доҕорун көлүнэрин биир дойдулаахтара сөҕө-махтайа көрөллөр. Соторутааҕыта ытын көлүнэн иһэр хаартыската Ватсап ситиминэн тарҕаммыта. Владимир Герасимович «Эдьигээн сонуннара» хаһыат ааҕааччыларыгар дьарыгын кистэлэҥин арыйар.

— Владимир Герасимович, эн хаһааҥҥыттан ыты көлүнэр буолбуккунуй?
— Мин элбэх оҕолоох табаһыт дьиэ кэргэнигэр төрөөбүтүм, онон оҕо сааһым ыраах тыаҕа ааспыта. Дьонум ыттары иитэллэрэ, ол иһин биһиги, оҕолор, ыты кытта доҕордоһо, ардыгар көлүнэ оонньуу улааппыппыт. Бу дьарыкпын бырахпакка олоҕум тухары илдьэ кэллим. Эрдэ «Буран» көлөтө суох эрдэхпинэ Ыҥыыр хайа анныгар күндүөпкэлиирбэр ыппын илдьэ сылдьарым, биир куул балыгы судургутук состорон таһаарарбыт.

— Ыты көлүнэргэ, иитэргэ туох ураты ньымалааххыный?

— Мин мэлдьи ыт оҕотун ылабын, хайа да дьыл кэмэ буоллун таһырдьа тутар идэлээхпин, дьиэҕэ киллэрбэппин. Түөрт атахтаахпын сабыллар ааннаах уйаҕа тирии тэллэхтээн сытыарабын, кыһыны кыстатабын. Оччоҕо ытым тулуурдаах, дьиэни тэпсибэт буола улаатар. Өрүү киһи курдук кэпсэтэ-ипсэтэ сылдьабын, сорудахпын толотторо үөрэтэбин. Биир сааһыттан саҕалаан моойугар быа иилэн оҕо салааскатыгар кыра-кыра сээкэйи ууран «тохтоо», «бар» дии-дии состоробун. Ыты бэйэбин кытта мэлдьи илдьэ сылдьан, тыаҕа таһааран «аҕал», «сыт», «кэл», «бар», «көрдөө» диэн тыллардаах сорудахтары биэрэбин. Ол да иһин ыттарым иччилэрин истэр, сымнаҕас сыһыаннаах буолаллар.

— Билигин ииттэр ытыҥ туһунан кэпсиэҥ дуо?

— Билигин аттыбар баар доҕорум Кэрэмэс диэн ааттаах, улахан көстүүлээх ыт, боруодатын билбэппин, тохсунньу ыйга 3 сааһын туолар. Килэҥ суолунан анал
быласмаас баалынайы ыппар иилэн баран 50 лиитэрэлээх бензини, биир куул балыка тиийэ состоробун, ардыгар бэйэм кытта олорсобун. Кыһын күндүөпкэ кэнниттэн Эдьигээн аннынан өрүскэ киирэн сыалыһардыыбын. Кэрэмэспин өрүү илдьэ сылдьабын, ытым доҕор да буолар, таһаҕаспын да таһааран улаханы абырыыр, онон иккиэн дьарыктаах буоламмыт аралдьыйабыт даҕаны.

Ааптар: Мария АПОЛЛОНОВА

Следите за самым важным и интересным в Telegram-канале и WhatsApp-группе ЯСИА