Үс нэдиэлэ аннараа өттүгэр кадавернай бүөрү тыыннаах киһиэхэ көһөрбүттэрэ. Мэйиитэ өлбүт киһини донор гынан бүөрүн биир ыарыһахха көһөрбүт эбит буоллахтарына, аны быарын атын киһиэхэ олортулар.
Саха сирин медисиинэтин идэтийбит дьоно ыараханнык ыалдьар эр киһиэхэ бүөрү уонна эдэр киһиэхэ быары көһөрдүлэр.
1-кы, 2-с №-дээх өрөспүүбүлүкэтээҕи былааһалар, доруобуйа харыстабылын национальнай киинин үлэһиттэрэ бэйэлэрин харыстаммакка дьон олоҕун туһугар турууластылар. Ити түмүгэр эпирээссийэ ситиһиилээхтик ааста.
От ыйын 21 күнүгэр өрөспүүбүлүкэ баһылыга Егор Борисов медисиинэ уопсастыбаннаһын кытта доруобуйа харыстабылын туһунан дьүүллэспиттэрэ. Онно үрдүкү технологиялаах медисиинэ уонна киһи уорганын көһөрүү болҕомто үөһүгэр тутуллубуттара. Ол сарсыныгар хоту улуустан сылдьар бүөрэ өр кэмҥэ ыалдьыбыт дьахтарга мэйиитэ өлбүт киһи бүөрүн олордубуттара. Кини билигин номнуо балыаһаттан тахсыбыт, искусственнай бүөртэн аны тутулуга суох.
Саха сирин доруобуйа харыстабылыгар министиэристибэтин пресс-сулууспатыттан Назар Аммосов Саха сирин историятыгар киирэр, кыһыл көмүс буукубанан суруллар бэлиэ түгэни уонна толору олоххо төннүбүт ыарыһахтары кытта кэпсэтиитин видеоҕа устубут.
