Кэм-кэрдии кэрчиктэригэр бэриммэт, олох ыарахаттарыттан, түһүүлэриттэн-тахсыыларыттан уостан-симэлийэн хаалбат Кырдьыбат Таптал, Улуу Таптал… Бу маннык дириҥ ис хоһоонноох, сырдык-кэрэ тыллар Эбээн-Бытантай улууһун олохтоохторугар, бииргэ эйэ-дэмнээхтик, иллээхтик 50 сыл устата олорбут дьоһун-мааны кырдьаҕас ыалга Зоя Васильевна, Тимофей Константинович Сотрудниковтарга ананнылар.
Сотрудниковтар сырдык тэрээһиннэрин устар ууну сомоҕолуур уус-уран тылынан улуус култууратын салайааччыта Лидия Сыроватская иилээн-саҕалаан олус истиҥник ыытта. Кини үбүлүөйдээхтэргэ Саха Өрөспүүбүлүкэтин Ил Дархана Айсен Николаев эҕэрдэтин үөрүүлээх быһыыга-майгыга ааҕан иһитиннэрдэ уонна, түгэнинэн туһанан, «Дьиэ кэргэн килбиэнин иһин» үрдүк бэлиэни ылбыттарынан эҕэрдэлээтэ.
ЗАГС салайааччыта, үбүлүөйдээхтэр сиэн балтылара Анна Слепцова эмиэ итии-истиҥ эҕэрдэтин анаан туран, Бочуот Кинигэтигэр илии баттыылларыгар көрдөстө.
Улуус баһылыга Гаврил Горохов муниципальнай тэриллии аатыттан эҕэрдэтин анаан туран, сэмэй бэлэҕин, итиэннэ дьиэ кэргэн килбиэнин иһин Кубогын туттарбыта дохсун ытыс тыаһынан доҕуһуолланна. Маны сэргэ Түгэһиир нэһилиэгин баһылыгын солбуйааччыта Алексей Слепцов, «Хаарчаана» уһуйаан сэбиэдиссэйэ Любовь Стручкова, «Үпэндьэл» эбээлэр бөлөхтөр, бииргэ үөрэммит үөлээннээхтэрэ эҕэрдэ эриэккэһин анаан туран сэмэй бэлэхтэрин туттарбыттара олус долгутуулаах түгэн буолла.
Бу тэрээһини сахалыы сиэдэрэйдик киэргэнэн кэлбит эбэлэрбит истиҥ-иһирэх тыллаах ырыанан түмүктээтилэр.
Анна Слепцова, ЗАГС салайааччыта:
— 2019 с. улуус үрдүнэн 32 оҕо төрөөбүтэ бэлиэтэннэ, бу иһигэр Саккырыырга – 26, Кустуурга – 3, Дьарҕаалаахха 3 оҕо төрөөбүтүн туһунан судаарыстыбаннай аакта оҥоһулунна.
Улууска быйыл 8 саҥа ыал эбилиннэ: Саккырыырга 7, Кустуурга 1 кэргэннии буолуу аакталара оҥоһулуннулар.
2019 сылга улууска 2 ыал кыһыл көмүс үбүлүөйдэрин бэлиэтээтилэр: 1969 сыллаахха балаҕан ыйын 1 күнүгэр Аллараа-Бытантай нэһилиэгин сэбиэтигэр 6№-дээх аакта суруллан Мария Николаевна, Дмитрий Александрович Аммосовтар ыал буолбуттар, 1969 сыллаахха балаҕан ыйын 10 күнүгэр Үөһээ-Бытантай нэһилиэгин сэбиэтигэр 6№-дээх аактатыгар киирэн Зоя Васильевна уонна Тимофей Константинович Сотрудниковтар кэргэннии буолбуттара бигэргэммит.
50 сыл устата куруук бииргэ эйэ-дэмнээхтик олорор дьол хас ыал аайы тиксибэт. Маннык уһуннук өйөһөн-өйдөһөн кэлбит ыал аҕыйах. Күүстээх таптал, бэриниилээх буолуу, бэйэ-бэйэҕэ убаастабыл, өйдөһүү баар буоллаҕына кыһыл көмүс үбүлүөйгэ тиийэр дьол тиксэр. Түгэнинэн туһанан, кыһыл көмүс үбүлүөйдээх дьоммутун ис сүрэхпиттэн эҕэрдэлиибин. Бу маннык мэлдьи илии илииттэн сиэттиһэн, өйдөһөн-өйөһөн өссө да уһуннук олороллоругар баҕарабын. Олоххо дьулуурдара өссө күүһүрдүн, кэнчээри ыччаттара чэчирии сайыннын, дьол, эйэ аргыстаах өссө да ыалдьыбакка уһуннук олордуннар!
Кыһыл көмүс уруу үбүлүөйдээх күнүн бэлиэтиир дьоро тэрээһиҥҥэ улуус баһылыга Гаврил Горохов, баһылык солбуйааччыта Раиса Старостина, дьиэ кэргэн салаатыттан Антонина Юмшанова, Түгэһиир нэһилиэгин баһылыгын солбуйааччыта Алексей Слепцов, ЗАГС салайааччыта Анна Слепцова, Зоя Васильевна өр сылларга бииргэ үлэлээбит «Хаарчаана» уһуйаанын сэбиэдиссэйэ Любовь Стручкова, үөлээннээхтэрэ — «Үпэндьэл» эбээлэр бөлөхтөрө, бииргэ үөрэммиттэрэ үөрүүлэрин үллэстэн дьаһалта дьиэтигэр мустаннар эҕэрдэ эриэккэһин, алгыс тыл маанытын анаатылар
Ааптар: Сардаана Копырина, Эбээн-Бытантай улууһа
