Кустуур нэһилиэгиттэн төрүттээх Егор Потапов Р.М. Дмитриев аатынан олимпийскай эрэллэр училищеларын бүтэрбитэ. Кини быйыл Коркин турнирыгар кытынна.


Эбээн-Бытантайтан улууһуттан куорсун анньынан көппүт Егор Потапов элбэх оҕолоох ыал ыччата. Элбэх сыраттан, күүстээх санааттан сыал ситиһиллэрин спортсмен эрэ барыта этинэн-хаанынан билэр буолуохтаах. Ол курдук, Егор дьонуттан тэйиччи сылдьан кыра сааһыттан спортивнай оскуолаҕа, онтон олимпийскай эрэллэр училищеларыгар үөрэммитэ.

Дмитрий Коркин турнирын күүстээх киирсиилэр кэннэ, Егор полуфиналга тахсыбыта. УҺук Илин уокурукка икки төгүллээх чемпион Александр Иванову кыайбыта. Саха сирин сүүмэрдэммит хамаандатын сүрүн тренерын эбээһинэһин солбуйааччыта Александр Оконешников Егор японец Юдаи Фуджитаны кытта киирсиитин чуолаан хайҕаабыта.

Санатан эттэххэ, Егор 2015 сыллаахха олимпийскай чемпион Роман Дмитриев аатынан III аан дойдутааҕы юниордар турнирдарыгар «Бастыҥ бөҕөс» аатын сүкпүтэ. Быйыл XII төгүлүн ыытыллар Д.Коркин аатынан аан дойдутааҕы турнирга кыттыыны ылан, полуфиналга киирдэ.

Биир дойдулаахтара уолларынан олус диэн киэн тутталларын биллэрэллэр. «Инникитин ситиһиини, туруоруммут сыалын ситиһэригэр баҕарабыт!», — дииллэр.

Ааптар: «Бытантай уоттара» хаһыат

0
0
comments powered by HyperComments