«Азия оҕолорун» Оонньууларын уота Дьааҥы улууһун ытык сириттэн — Киһилээх хайатыттан уматыллан, улуустартан аан бастакынан көрсөр чиэскэ Эбээн-Бытантайдар тигистибит.
Муус устар 1 күнүгэр Дьааҥы уонна Эбээн-Бытантай кыраныыссаларыгар улуус бастыҥ спортсменнара мустаннар Киһилээх хайатыттан сүүрэн кэлбит дьоннорбутун уохтаах кымыһынан, эбээн норуотун төрүт аһынан айах тутан көрүстүбүт. Дьааҥы улууһун экстремал-сүүрүктэрэ Дмитрий Горохов, Христофор Чукров, Валерия Яковлева уоту арыаллаан билигин да кыһыҥҥылыы сытар тоҥуу суолунан сүүрдүлэр. Эстафета уотун Дьааҥы улууһун дьаһалтатын баһылыгын солбуйааччыта Михаил Игнатьев Эбээн-Бытантай улууһун дьаһалтатын баһылыгын солбуйаччытыгар Раиса Старостинаҕа үөрүүлээх быһыыга-майгыга туттарда.
Улуус киинигэр Баатаҕай-Алыытыгар киириигэ — Чубукулаахха «Гарпан» этно-культурнай киин үлэһиттэрэ эбээннии эҕэрдэлээн көрүстүлэр, ытык уоту көрсүү сиэрин-туомун оҥордулар. Раиса Старотина уоту Түгэһиир нэһилиэгин баһылыгын солбуйааччытыгар Дмитрий Нохсоровка туттарда. Кинилэр бөһүөлэккэ диэри эстафетаны салҕаан сүүрдүлэр. «Хаарчаана» оҕо уһуйаанын аттыгар кырачааттар тымныы күнү аахсыбакка тулуйан кэтэһэн үөрэн-көтөн мичилийэн көрүстүлэр.
Кинилэр эмиэ бу кэрэ-бэлиэ түгэни уруйдаан эстафета уотун тутан баран сүүрбүттэрэ барыбытын долгутта. Салгыы Саккырыыр орто оскуолатын бастыҥ спортсменнара Айсен Николаев, Лаура Попова уоту ДЮСШ-ҕа диэри тиэртилэр.
Эстафета уотун көрсүһүүгэ ДЮСШ улаханныын-кыралыын, эдэрдиин-эмэнниин үгүс дьон саалаҕа толору мустан чиэстээтилэр. Киэһэ 7 чааска «Гарпан» культура киинигэр «тыыннаах» көрүдүөрүнэн уоту көрсөн, эбээннии сиэр быһыытынан ыраастааһын оҥорон , алгыыр-арчылыыр тэрээһин ыытылынна. Бары киирэн ыраастанан баран, Түгэһиирдии «һээдьэнэн» айхаллаатылар. Дьааҥы улууһун бэрэстэбиитэлэ Дмитрий Горохов эстафета уотун, сыалын-соругун туһунан сиһилии кэпсээтэ, эрчиллиилэри көрдөрдө.
Оонньуу уотун көрсүү сиэригэр-туомугар, о.д.а. тэрэһинигэр оҕолуун-улахан дьоннуун барыта 1200 киһи кытынна.
Нөҥүө күнүгэр эстафета салгыы нэһилиэктэринэн айаннаата.
