Эбээн-Бытантай улууһугар олох-дьаһах коммунальнай тэрилтэтигэр уопсайа 84 киһи үлэлиир. Убаҕас уматыгынан 5 хочуол, кытаанах оттуктаах биир хочуол оройуону итиинэн хааччыйар. Ититэр ситим уопсай уһуна — 25 км. 972 м. усталаах, о.э. Баатаҕай Алыытыгар 20 км. 332 м, Кустурга 4 км. 93 м., Дьарҕалаахха 0,71 км.
Кыстыкка киириигэ бэлэмнэнии үлэлэр туһунан Эбээн-Бытантайдааҕы ОДьКХ салайааччыта Максим Петрович Гороховы кытта кэпсэттибит.
— Максим Петрович, дорообо! Кыстыкка киириигэ туох үлэлэр ыытыллыбыттарын туһунан сырдата түс.
— Атырдьах ыйын 29 күнүттэн саҕалаан, температурнай графигынан бары хочуолларга оттук кэмигэр саҕаланна.
2019 сыллааҕы өрөмүөн үлэтин былаана 100% туолла. 1№-дээх киин хочуолунайга өрөмүөнү бэдэрээтчик «РЕМСТРОЙПРОЕКТ» ыытта. Кинилэр былырыыҥҥы 2018 сыллааҕы үлэлэрин ситэри оҥордулар. Онно киирэр, топливнай таҥыы үлэлэрин кээмэйдэрин (емкостарын) буомнааһын, туһааннаах сирин хаххалааһын, баһаары тохтотор носуостаах ыстаансыйалаах резервуардары туруоруу уонна онтон да атын үлэлэр ыытылыннылар. Алтынньы ый тиһэх күннэригэр диэри манна өрөмүөн толору түмүктэниэҕэ. Маны таһынан, филиал бэйэтин күүһүнэн Портовская уулусса киириититтэн саҕалаан, «Хаарчаана» оҕо уһуйааныгар диэри 256 миэтирэ уһуннаах магистральнай ититэр ситим уларыйда.
2№-дээх (баанньык) хочуолунайга «ЛЕНАГАЗСТРОЙ» бэдэрээтчик быһыытынан үлэлээтилэр. Манна уопсайа 6 МВт кыамталаах 3 хочуол саҥардылынна. Бэйэбит үлэһиттэрбит сүрүн ууну эргитэр (циркуляционнай) уонна ууну иҥэрэр (подпиточнай) носуостары уларыттылар, туорааһын ититии ситимигэр 10 погоннай м турбалары олордон саҥардан биэрдилэр. Ону тэҥэ биир ILKA-10 2,4 МВт кыамталаах саҥа горелка туруорулунна.
8№-дээх нүөмэрдээх хочуолунайга бэйэбит үлэһиттэрбит 30 м уһуннаах магистральнай турбалары уларыттылар.
— Быйыл хас саҥа эбийиэк ититии ситимигэр холбонно?
— 10 олорор дьиэ.
— Уматык саппааһа хайдаҕый?
— Убаҕас оттук саппааһа балаҕан ыйын 26 күнүнээҕи туругунан, 2033 туонна. Бу аата биһиги былаанынан туруоруллубут температурнай графиктаах лимитынан сөпкө баран иһэбит. Хочуолунайдарга уматык саппааһа 2020 сыл тохсунньу ый 9 күнүгэр диэри тиийэр.
— Элбэх дьон дьиэбит тымныы дииллэр, тоҕо?
— Билиҥҥи туругунан ититии ситимигэр наладка үлэтэ бара турар. Ол аата, хас биирдии дьиэҕэ ититии кыамтата биир тэҥник тарҕатылларын курдук көрүү-истии ыытыллар. Сотору кэминэн чөлүгэр түһүөҕэ.
Киинтэн ыраах тайаан сытар хоту сир дьонун олохторун хаачыстыбатын тупсаҕай оҥоруу сүрүн сорук буолар. Дьон олоҕун хаачыстыбатын тупсарыы кини ханна олороруттан тутулуга суох буолуохтаах. Эбээн-бытантайдар этэҥҥэ кыстыкка киирдилэр.
Ааптар: «Бытантай уоттара» хаһыат, Эбээн-Бытантай улууһа
