Ааспыт өрөбүл күн «50 лет Победы» спорт дыбарыаһыгар Валерий Керемясов кэриэһигэр Дьокуускай куорат көҥүл тустууга аһаҕас чемпионата буолан ааста. Эбээн-Бытантай бөҕөһө бастыҥ ааты сүктэ.


Арассыыйа физическэй култууратын үтүөлээх үлэһитэ, Саха Өрөспүүбүлүкэтин үтүөлээх тренера Валерий Керемясов кэриэһигэр Дьокуускайга тустууга чемпионат буолла. Үгэскэ кубулуйбут күрэхтэһии сылын аайы сэтинньигэ ыытыллар. Быйылгы турнирга 10 араас ыйааһыҥҥа кытыннылар.

Эбээн-Бытантай уола Егор Потаповы кытта тэҥҥэ 61 кг диэри ыйааһыҥҥа 20 бөҕөс кииристэ. Финалга Егор аан дойдутааҕы кылаастаах маастары Георгий Окороковы кытта тыҥааһыннаах киирсии түмүгүнэн, 3:2 ахсааҥҥа кыайылааҕынан таҕыста. Ону тэҥэ бу турнир бастыҥ бөҕөһүн аатын сүктэ.

Валерий Петрович Керемясов дьиэ кэргэнэ уонна аймахтара эрэллээх спортсмеҥҥа анал бириис – МР-155 саа — ыларга сертификат туттардылар.

Ааптар: Яна Рожина, Эбээн-Бытантай улууһа

0
0
comments powered by HyperComments