Үтүө үгэскэ кубулуйбут сылын аайы ыытыллар Эбээн-Бытантай улууһун аҕа баһылыгын харыйата буолла. Саккырыыр, Кустуур, Дьарҕаалаах оскуолаларыттан, улуустааҕы оҕо саас кииниттэн, оҕо спортивнай оскуолатыттан туйгун үөрэхтээх, улуустааҕы, өрөспүүбүлүкэтээҕи уонна Арассыыйатааҕы спортивнай, култуурнай күрэхтэргэ, конкурстарга уонна олимпиадаларга кыттан, уһулуччу ситиһиилээх 40 оҕо ыҥырыллан сырытта.
Урукку кэмҥэ Эбээн-Бытантай улууһун харыйата икки күн устата барар эбит буоллаҕына, быйыл биир эрэ күн буолла. Сарсыарда өттүгэр оҕо спортивнай оскуолатыгар психолог идэлээх педагогтар Елена Ушницкая уонна Елена Слепцова оҕолор бэйэ-бэйэлэрин кытта билсэллэригэр, бииргэ түмсэллэригэр анаан психологическай тренинг ыыттылар. Манна оҕолор 5 хаамандаҕа арахсан араас сорудахтары толордулар, оонньоотулар.
Киэһэ өттүгэр сүрүн тэрээһин улахан хойутааһына суох саҕаланна. Тэрийээччилэр былырыыҥҥы курдук оҕолорго кыһыл субурҕас таҥаһы муостаҕа тэлгээн, анал хаартыскаҕа түһэр зоналаах былаһаакка оҥорбуттар. Үөрүүлээх чааһы Мария Аммосова – Саккырыыр оскуолатын учуутала уонна Анастасия Слепцова – Түгэһиир нэһилиэгин эдэр ыччатын лидера иилээн-саҕалаан ыыттылар. Өрөгөйдөөх муусуканан кыттааччылары ааттаталаан, ситиһиилэрин ааҕан «кыһыл суолунан» хаамтардылар. Бэрткэ киэргэтиллибит саалаҕа оҕолор киирэн бэлэмнэммит вальстарын үҥкүүлээтилэр уонна улуус гимнын толордулар.
Улуус аҕа баһылыгын солбуйааччыта Раиса Дмитриевна Старостина бииртэн биир чаҕылхай, бастыҥ уонна араас ситиһиилэрдээх үөрэнээччилэри бу бэлиэ күнүнэн уонна кэлэн иһэр Саҥа дьылынан эҕэрдэлээн туран аҕа баһылык аатыттан махтал суруктары уонна 5 тыһыынча солк. харчынан бириэмийэни туттарда.
Оҕолор эҕэрдэ тыл этэн, бэйэлэрэ илиилэринэн оҥорбут оҥоһуктарын баһылык Горохов Гаврил Гаврильевичка бэлэх ууннуллар. Уруһуйга талааннаах оҕолор улуус салайаачытын мэтириэтин харандааһынан кумааҕыга ойуулаан, бэйэтигэр туттардылар.
Улууска маҥнайгы улахан Саҥа дьыллааҕы тэрээһин Тымныы кыһын оҕонньоро суох ааспата. «Гарпан» култуура киинин үлэһиттэрэ туруорбут эҕэрдэ нүөмэрдэрин кэнниттэ, Тымныы кыһын оҕонньор киирэн барыларын эҕэрдэлээн минньигэс бэлэхтэри туттарда.
Тэрийээччилэртэн биирдэстэрэ, уопуттаах педагог Гутовская Евдокия рефлексия ыытта. Манна кыттааччылар тэрээһин туһунан санааларын үллэһиннилэр. Бэлиэтээбит түгэннэрин түмэн суруйдахха маннык. Быйыл «биир эрэ күн» буолбута үгүс оҕону хомоппут уонна култуура киинин дьиэтэ тымныы буолан «киэргэнэн кэтэн кэлбит түүпүлэбитин устан, унтуубутун кэппиппит соччото суох» уонна атына барыта үчүгэй диэн аһаҕастык санааларын этэн туран, тэрийээччилэргэ махталларын тиэртилэр.
Ааптар: Илана Колесова
