Аан дойду икки, Арассыыйа алта төгүллээх чөмпүйүөнэ Виктор Лебедевка көҥүл тустууга дойду сүүмэрдэммит хамаандатыгар куруук миэстэ баар. Итинник санааны хамаанда тренерэ Дзамболат Тедеев суруналыыстары кытта көрсүһүүгэ эттэ.
«Урукку өттүгэр албан аатыра сылдьыбыт уонна билигин бочуоттаах спортсменнарга Арассыыйа сүүмэрдэммит хамаандатыгар куруук миэстэ баар. Бу Виктор Лебедевка эмиэ сыһыаннаах. Кини тустар санаалаах буоллаҕына, күүтэбит», —диэтэ Дзамболат Тедеев.
Олимпийскай оонньуулар кэннилэриттэн саха тустуугун тренерэ Владимир Модосян Лебедев тустууну тохтоппотун, ол оннугар ыарахан ыйааһыҥҥа тустарын туһунан эппитэ. Ону таһынан Виктор Лебедев тохсунньуга ыытыллар Иван Ярыгин бирииһин турнирыгар кыттыан сөбүн бэлиэтээбитэ. Лебедев бу турниртартан кыһыл көмүс (2015 сыл), үрүҥ көмүс (2009 сыл) боруонса (2010, 2016 сылларга) мэтээллэри аҕалбыта.
«Мин Викторы кытта кэпсэппитим. Кини Арассыыйа сүүмэрдэммит хамаандатыгар төннөрүгэр этии киллэрбитим. Кини сынньанан баран эһиилгиттэн ыла дьаргын саҕалыа дии саныыбын», — диир Тедеев.
