Дьылдьыт Андрей Варламов хортуоппуйу хойут олордорго сүбэлиир

0
126

Киин, илин эҥээрдээҕи улуустар уонна Дьокуускай куорат эргиннээҕи ыаллар хортуоппуйдарын Ньукуолун саҕана олордор үгэстээхтэр. «Быйыл сааскы халлааммыт ураты тымныы буолла. Онон, ыксыыр табыллыбат», — диир дьылдьыт Андрей Варламов.


«Тымныы буорга олордуллубут сиэмэ хортуоппуй «иэдэйэр». Анды көҥүлүн иннинэ, ыам ыйын бүтэһик күннэригэр сылыйдаҕына олордоргут ордук«, — диэн кэпсиир Андрей Варламов. 

Дьылдьыт быйылгы сааһы, сайыны билгэлээһинин «Саха сирэ» хаһыат ыам ыйын 3 күнүнээҕи нүөмэригэр «Эрдэһит саас эридьиэһэ» диэн төбөлөөн таһаарбыппыт. Андрей Алексеевич онно эппитин чиҥэтэн, халлаан өрүс мууһа аастаҕына көнөн, ыам ыйын 20 күнүн кэнниттэн (23 диэкиттэн) 17-18 кыраадыс сылыйыа, онтон бэс ыйын 9 күнүттэн 20-гэр диэри 27 кыраадыска диэри итийиэ диир.

Манна даҕатан эттэххэ, Андрей Варламов сабаҕалаабытын курдук, Дьокуускайга уонна киин, илин эҥээрдээҕи улуустарга ыам ыйын 13 уонна 17 күннэригэр халлааммыт таппыт сиринэн ардаан (Бүлүү сүнньүгэр хаардаан) ылла. Ол гынан баран, сиигин тута тыалынан көтүтэн кэбиһэр. «Кураанныыр чинчитэ. Ити эрээри, быйыл кураан кэлэ охсуо суоҕа. Илин эҥээргэ бэс ыйыгар «солко ардахпыт» түстэр диэн эрэнэ күүтэбин. Оччоҕуна эрэ отун-маһын абырыа», – диэн бүччүм санаалаах.

Иккиһинэн, «быйыл сааспыт төһө даҕаны эрдэлээбитин иһин, улуу эбэ эстэр кэмигэр эстиэҕэ» диэбитэ көрөн туран эппит (көрүүлэммит дуу) курдук буолан таҕыста. Гидрометеорологтар, уу хаһаайыстыбатын исписэлиистэрэ уонна араас интэриниэт-билгэһиттэр «Өлүөнэ өрүс Дьокуускай аннынан уонча хонук эрдэлээн эстиэ» диэн сабаҕалаабыттара туолбата. Андрей Алексеевич ону: «Хаартан уу кэлбэккэ, мууһун кыайан көтөхпөтө», – диэн судургутук быһаарар.

Өссө «… чычаас, оттоох күөллэргэ саас эрдэ күл ыспыт кусчуттар бултуйуохтара» диэбит санаата туолла диэххэ сөп. Улахан күөллэр билиҥҥэ диэри мууһунан көрөн сыталлар. «Алаас сирдээхтэр уонна өрүс арыыларыгар сыппыт уолаттар куһу ыппыттар. Хоту олус тымныы буолан, хаас төннөн кэлэн ыттарда быһыылаах», – диир.

Андрей Алексеевич бэс ыйыттан уоппуска ылан, дойдутугар, Мугудайга, андылыы тахсаары оҥостор. «Анды көҥүлүн саҕана халлааммыт эмиэ илинтэн тыалырара буолуо. Оччоҕуна мэлитэр. Оннооҕор биир улуус иһигэр хоту уонна соҕуруу нэһилиэктэр уратылаһаллар. Анды сылдьар суоллаах, наар хоту нэһилиэктэри таарыйар. Ол гынан баран, аҕыйах анды ойдон кэлиэн сөп», – диэн Байанайа мичик гынарыгар эрэллээх дьылдьыт, андыһыт Андрей Варламов.

edersaas.ru

0
0

Хоруй суох

Хоруйдаа