Саҥа кинигэ сүрэхтэнэр үөрүүлээх чааһын спорду сырдатар суруналыыс, комментатор Дьулустаан Захаров иилээн-саҕалаан ыытта. Тэрээһиҥҥэ араас сылларга «Дыгын оонньууларыгар» кыттыбыт эр бэртэрэ, кыайыылаахтар, судьуйалар, күрэхтэһиини тэрийээччилэр, суруналыыстар уонна спорду таптааччылар муһуннулар. Хронологическай бэрээдэгинэн суруллубут оонньуу кыайыылаахтарын, түһүмэхтэрин туһунан интэриэһинэй кинигэни суруналыыс Родион Кривогорницын хомуйан оҥордо.
Сайын аайы Туймаада хочотун ыһыаҕар ыытыллар күрэхтэһиибит «Дыгын оонньуулара» диэн ааттанан 1995 сылтан ыытыллар. Дьокуускай куорат дьаһалтатын баһылыгын дьаһалыгар ыһыах кэмигэр ыытыллар 15 тэрээһин аатыгар бу күрэхтэһии «Үрүҥ Уолан» диэн ааттанан сылдьар. Онтон, аны, «Саха сирэ» уонна «Эхо недели» хаһыаттарга «Дыгын оонньуулара» диэн аатынан суруллубут. Бу тугун-ханныгын быһааран туоһулуур ханнык да докумуон хаалбатах эбит.
Кинигэни бэчээккэ бэлэмнээбит суруналыыс Родион Кривогорницын: «2008 сыллаахха бэйэм үппүнэн «Тыгын оонньуулара» диэн брошюра таһаарбытым. Оттон бу саҥа тахсыбыт кинигэни хаһыаттарга, араас бэчээккэ тахсыбыт матырыйаалларга олоҕуран оҥордум. Маны тэҥэ, Борис Винокуров диэн «Дыгын оонньууларын» сүгүрүйээччитигэр махталбын тиэрдэбин. Кини оонньуулар саҕаланыахтарыттан хас биирдии сыл кыайыылаахтарын бэлиэтээн, таблица оҥорон испит эбит. Биир интэриэһинэй түгэни кэпсиэхпин баҕарабын. Мин маҥнайгы кылааска үөрэнэ сырыттахпына, «Дыгын оонньууларын» үс төгүллээх кыайыылааҕа Иннокентий Макаров физкултуура учууталынан үлэлии кэлбитэ. Иннокентий Федорович миигин спорка киллэрбит киһинэн буолар, учууталым туһунан кинигэ таһаарыам диэн санаабат этим. Бу кинигэни ыччакка, кэлэр көлүөнэҕэ аныыбыт».
Тэрээһиҥҥэ араас сылларга «Дыгын оонньууларыгар» кыттыбыт эр бэртэрэ, кыайыылаахтар, судьуйалар, күрэхтэһиини тэрийээччилэр, суруналыыстар уонна спорду таптааччылар муһуннулар.
Дириҥ историялаах күрэхтэһии туһунан кинигэни суруйарга тыл көтөхпүт киһи, РФ физкултууратын уонна спордун туйгуна Михаил Друзьянов: «Дыгын оонньуулара» күрэхтэһии сыллата таһыма үрдүүр. Бу кинигэ тахсыбыта — саамай сөп, икки сылынан оонньуу тэриллибитэ 25 сыла буолар. Өссө күүскэ сайдарыгар, төрүт көрүҥнэр сүппэттэрин туһугар сүбэ, кириитикэ киириэн баҕарабыт. «Арктик Капитал» холдинг төрүттээччитэ Матвей Евсеев «Дыгын оонньууларын»мас тардыһыыны курдук тас дойдуларга тарҕатыахха диэн санаалаах», — диэн этэр.
edersaas.ru
