14 саастаах Хаҥалас улууһун дуобатчыта Айсен Егоров аан дойду 10 төгүллээх чөмпүйүөнүн Алексей Чижовы кытары тэҥҥэ киирсэн, бу күннэргэ элбэх киһини үөртэ. Саха сирин дуобакка Федерациятын толорооччу дириэктэрэ Николай Стручков күрэхтэһии туһунан СИАҕа кэпсээтэ.


Москваҕа бу күннэргэ оҕолорго уонна улахан дьоннорго, эр дьоҥҥо, дьахталларга, ыччаттарга туһунан нуучча уонна 100 харахтаах дуобаттарга Арассыыйа чөмпүйэнээтэ ыытылла турар. Алтынньы 1 күнүгэр диэри ыытыллар күрэххэ 100-чэ киһи кыттар. Саха сириттэн — 20 спортсмен.

Саха сирин дуобакка Федерациятын толорооччу дириэктэрэ Николай Стручков матч хас да бырагырааманан барбытын кэпсиир. «14 саастаах Сандаара Апросимова түргэн оонньууга иккис буолла, блицка – үһүс. Тунаара Федорова блиц киирсиигэ иккис-үһүс миэстэлэри аҥардаста. Алексей Большаков уонна Айсен Егоров күүстээх утарсааччыларын кыайан, уон иһигэр киирдилэр. Барыта, хас да бырагырааманан оҕолор уонча мэтээли ыллылар “, – диир Николай Стручков.

Айсен Егоров Чижовтыын киирсиитэ түмүктүүр турга буолта. Айсен үрдүк таһымын көрдөрдө, кыайыан да сөп этэ. Алексей кыайбыта буоллар үс иһигэр киириэхтээҕин, Айсенныын оонньуута тохтотто ”, – диир Николай Стручков.

Айсен Егоров дуобатынан кыра эрдэҕиттэн дьарыктанар, Арассыыйа, Европа, аан дойду күрэхтэһиилэрин кыайыылааҕа. Саха сирин сборнайын биир бастыҥ дуобатчыта. “Дуобат эйгэтигэр Айсены билэллэр, киниэхэ тэҥнээхтэригэр курдук сыһыаннаһаллар “, – диир аан дойду түөрт төгүллээх чөмпүйүөнэ Николай Стручков.

Айсен Егоров Хаҥаласка тренер Александр Соломоновка дьарыктанар.

Сигэн:

0
0

Хоруй суох

Хоруйдаа

Лимит времени истёк. Пожалуйста, перезагрузите CAPTCHA.