Дуобат саха норуотун биир тѳрүт оонньуута. Ааттыын да сахалыы. Аны ыччаттарбыт Арассыыйаҕа эрэ буолбакка аан дойдуга күүстээхтэринэн биллэллэр. Гаврил Колесов аан дойду 11 тѳгүллээх чөмпүйүөнэ буолла. Эдэр ыччаты бу өйү сытыылыыр оонньууга угуйар туһуттан, дуобакка нэһилиэктэр хамаанданан күрэхтэһиилэрэ ыытыллыа.
Дуобат оонньуутун салгыы сайыннарар сыаллаах, олунньу 25 күнүгэр, Мэҥэ Хаҥалас улууһун Төҥүлүтүгэр өрөспүүбүлүкэ нэһилиэктэрин ортолоругар, СӨ уонна Арассыыйа үтүѳлээх тренерэ Николай Николаевич Кычкин аатынан хамаанданан Кубок тэриллэр.
Хамаанданан дуобат оонньуутун сөбүлүүр нэһилиэк олохтоохторо, үөрэнээччилэрэ кыттыыны ылаллар. Бырапыыскалара нэһилиэккэ эрээри, атын сиргэ баран үлэлиир, үѳрэнэр, олорор дьон бу күрэскэ тѳрѳѳбүт нэһилиэктэриттэн кыттар кыахтара суох.
Күрэх сүрүн сыала тугуй?
Тыа сиригэр олорор дьону көҕүлээһин. Онон бастыыр баҕа санааттан атын сиргэ, куоракка олорор, үлэлиир, үөрэнэр биир дойдулаахтары хомуйа сатаабакка, дэриэбинэҕэ олорооччулары түмэн, дьарык ситимин тэрийэн кыттыы бу — улахан кыайыы.
Нэһилиэк хамаандатыгар эр киһититтэн, дьахтарыттан, оҕотуттан тутулуга суох 5 дуобатчыт кыттар.
Ханнык көрүҥүнэн оонньуулларый?
Кыттааччылар 64 харахтаах дуобакка күрэхтэһиэхтэрэ. Арассыыйаҕа уонна аан дойдуга киэҥник тарҕанан эрэр швейцарскай систиэмэнэн 3 мүнүүтэлээх чаҕылханныы (молниеноснай) уонна 10 мүнүүтэлээх түргэн (быстрай) оонньууга киирсиэхтэрэ.
Түмүгү хайдах быһыылаахтык таһааралларый?
Дуобат көрүҥнэринэн түмүк тус-туспа тахсыаҕа. Уопсай түмүккэ икки көрүҥҥэ хамаандалар ылбыт миэстэлэрэ сууммаланыа. Кыайыылаах хамаанда Николай Николаевич Кычкин аатынан кѳһѳрүллэ сылдьар Кубок хаһаайына буолуоҕа.
Сайаапканы ханна ылалларый?
Хамаандалартан сайаапканы олунньу 1 күнүгэр диэри sklmff@mail.ru электроннай аадырыска ылаллар.
