Балаҕан ыйын 16 күнүгэр Оҕо Дьокуускай куораттааҕы анал дьиэтин иллээх кэлэктиибэ «Доруобуйа маһын олорт!» акцияҕа кытынна. Олордуллар маһы Дьокуускай к. 3 №-дээх балыыһата биэрдэ.
Саха Өрөспүүбүлүкэтигэр Тупсарыы, Дьокуускай куоракка Үлэ сылларынан ыытыллар акцияҕа Оҕо дьиэтин кырачаан иитиллээччилэрэ иитээччилэри, эмчиттэри кытары лаппаахылаах, уу кутар иһиттээх тахсан олорор дьиэлэрин тула үлэлээтилэр.
Акцияҕа СӨ Ыччат бырабыыталыстыбатын бэрэссэдээтэлин солбуйааччы Ариан Сергеев кытынна. «Кылаабынай быраас Наталья Слепцова салайар Оҕо дьиэтин кэлэктиибэ «Доруобуйа маһын олорт!» акцияны өйүүргэ быһаарыммыта олус кэрэхсэбиллээх. Биһиги бары олорор өрөспүүбүлүкэбитин таптыыбыт уонна кини куруук кыраһыабай, ыраас буолуон баҕарабыт. Тулаайах уонна төрөппүт көрүүтэ-истиитэ суох хаалбыт оҕолорго бу акцияҕа кыттыы иитэр-үөрэтэр суолталаах. Өрөспүүбүлүкэ атын да эмтиир тэрилтэлэрэ акцияны өйүүллэригэр эрэллээхпин», – диэн Ариан Николаевич эттэ.
Онтон Наталья Слепцова оҕо инфекционнай клиническэй балыыһатын үлэһиттэригэр хурустаал кубогы үөрүүлээх быһыыга-майгыга туттарда. «Бүгүн биһиги оҕолорбут хатыҥ мастары үөрэ-көтө олортулар. Таһырдьа күүлэйдии тахса сылдьан бэйэлэрэ олордубут мастарын үөрэ-көтө көрүөхтэрэ-истиэхтэрэ. Саҥа дьиэ таһа бу сыл ыам ыйыттан саҕалаан сыыйа-баайа тупсарыллар. Алтынньы 3 күнүгэр аҕам саастаах дьон бүтүн Россиятааҕы күнүн чэрчитинэн «Бэтэрээннэр аллеяларын» оҥорорго былаанныыбыт», – диэтэ.
Оҕо инфекционнай клиническэй балыыһатын кылаабынай бырааһа Владимир Богдашин эстафетаны тутан, доруобуйа харыстабылын тэрилтэлэрэ үлэҕэ эрэ буолбакка, уопсастыбаннай үлэҕэ эмиэ биир санаанан кытталлара улахан суолталааҕын бэлиэтээтэ.
