Дьокуускайга Аҕа Дойду Улуу Кыайыытын 75 сыллаах үбүлүөйдээх параадыгар 75 сатыы холуонна уонна байыаннай тиэхиньикэ хаамыаҕа. Бу туһунан СӨ ыччат дьыалаларыгар уонна социальнай коммуникацияларга министиэристибэтин пресс-сулууспата иһитиннэрэр.
«Параат сатыы холуонналарыгар саллааттар, офицердар, казактар, кадеттар, эдэр армеецтар уонна үөрэх кыһаларын үөрэнээччилэрэ кыттыыны ылыахтара. Араас хабааннаах байыаннай тиэхиньикэ көрдөрүллүөҕэ», — диэн этиллэр.
Маны таһынан ыам ыйын 9 күнүн бырааһынньыктааҕы тэрээһиннэрин чэрчитинэн «Кыайыы Параада дьиэҕэ» уонна «Манна Дьоруой олорор» бүтүн Россиятааҕы аахсыйалар ыытыллыахтара. Үгэс буолбут «Өлбөт үйэлээх полк» ыытыллыаҕа.
2019 сылга хаамсыыга 40 тыһыынчаттан тахса киһи кыттыыны ылбыта бэлиэтэнэр.
«2020 сылга Улуу Кыайыы 75 сылыгар анаммыт сүрүн тэрээһиннэртэн биирдэстэринэн Ильмень күөлгэ буолбут хабыр хапсыһыы байыаннай-историческэй туруоруута уонна 100 килэмиэтирдээх хайыһарынан сүүрүү буолаллар», — диэн миниистир Степан Саргыдаев эттэ.
Репетиция кулун тутар 16 күнүгэр ыытыллара этиллэр.
Бүгүҥҥү күҥҥэ Саха сиригэр 78 сэрии бэтэрээнэ олорор, олортон 46-та Дьокуускай куоракка, суруйар НВК «Саха».
