Дьокуускай куоракка ыарахан балаһыанньаҕа түбэспит дьону өйүүр социальнай остолобуой аһыллан үлэлээбитэ биир сылын туолла. Бу кэм устата 7710 киһини аһаттылар.

Хаҥастан иккис — Ирина Гузова. 

Социальнай остолобуойу “Графский берег” кафе хаһаайката, предприниматель Ирина Гузова куорат дьаһалтатын, Промышленнай уокурук управлениетын, социальнай көмүскэл управлениетын, Дьокуускайдааҕы епархия өйөбүллэринэн, арыйбыта. Манна ыарахан балаһыанньаҕа түбэспит дьиэ кэргэттэр, элбэх оҕолоохтор, инбэлииттэр, үлэтэ суохтар кэлэн, толуонунан босхо аһыахтарын сөп. Кинилэри уокуруктар управлениелара ыйан ыыталлар. Менюга миин, торуой, салаат, хомпуот баар буолар. Сылдьыбыт дьон астара минньигэһин, үлэһиттэр эйэҕэстэрин бэлиэтииллэр.

Дьону аһаталларын таһынан, Саҥа дьыл, Кыайыы күнүн, Пасха, ыһыах бырааһынньыктарын тэрийэллэр. Бу күннэргэ социальнай остолобуой аһыллыбыта 1 сыла туолбутунан, “Оҕоҕун оскуолаҕа бэлэмнээ” диэн аахсыйаны тэрийэн ыыттылар. Ол эбэтэр остолобуойга кэлэн аһыыр оҕолорго канцелярскай табаардары, үрүксээктэри, таҥаһы-сабы бэлэхтээтилэр. Бырааһынньыктааҕы аралдьытар-сынньатар бырагыраамаҕа оҕолор ыллаатылар, үҥкүүлээтилэр, дуоһуйа оонньоотулар.

Ким баҕарар бу аһымал аахсыйаҕа кыттыһан, оҕолорго бэлэх биэриэн, үтүө дьыаланы үксэтиэн сөп.

Ангелина Васильева, “Саха сирэ” хаһыат, edersaas.ru

0
0
comments powered by HyperComments