Туһанааччы быраабын аан дойдутааҕы күнүгэр анаан «Сайсары» бааһынай ырыынагар доруобай ас дьаарбаҥката буолла. Олохтоох оҥорон таһаарааччылар бэйэлэрин табаардарын, бородууксуйаларын дьон дьүүлүгэр таһаардылар.
Күрэххэ кыттар табаар барыта СӨ Роспотребнадзорун управлениетыгар лабораторнай хонтуруолу ааспыт. Дьүүллүүр сүбэҕэ Роспотребнадзор, Россельхознадзор, ветеринария Департамена, Тыа хаһаайыстыбатын уонна ас-үөл бэлиитикэтин министиэристибэтэ, М.К. Аммосов аатынан ХИФУ медицина института, Доруобуйа харыстабылын министиэристибэтэ, куорат уокуруга киирбиттэр. Хамыыһыйа бородууксуйа хаачыстыбатын уонна амтанын эрэ буолбаккаЮ нэһилиэнньэҕэ сырдатар-иһитиннэрэр буклеттары эмиэ сыаналаата.
Барыта 11 оҥорон таһаарааччы араас улуустартан кыттыыны ыллылар.
«Биһиэхэ саамай дьиҥнээх үүт уонна эт ас баар. Туох да эбилигэ суох. Барытын туһаҕа таһаарабыт, ол иһигэр сүөһү иһин эмиэ. Быыстапкаҕа бэлэм бородууксуйабытын аҕаллыбыт, — диир СИА-ҕа Улахан Аан «Бөртө»ТХПК технолога Анна Мохначевская. — Сыанабыт да чэпчэки. 400 граммнаах сүөгэй 200 солк., киилэ аҥара иэдьэгэй 100 солк. Кириисиһинэн сибээстээн сыананы үрдэппэтибит. Дьон биһиги бородууксуйабытыгар наадыйара уҕараабата».
Кыайыылааҕынан Мэҥэ Хаҥалас улууһун «Хоту» ТХПК буолла. Тэрилтэ бары үлэһиттэрэ гигиеническай үөрэҕи босхо баралларыгар сертификат туттарылынна.
