Дьокуускайга өлүүлэһэн тутуу сокуонуттан сылтаан дьиэ сыаната төһө үрдүөҕэй?

“Өлүүлэһэн тутууга кыттыы туһунан” 214 №-дээх Федеральнай сокуон суобаһа суох тутааччылартан көмүскүөҕэ. Ол эрээри сокуоҥҥа атын өрүт эмиэ баар…

Дьон атыылаһар кыаҕы улаатар, бэриллэр ипэтиэкэ кээмэйэ эмиэ үрдүүр.

“Өрөспүүбүлүкэҕэ кэлэр сылга атыылана илик дьиэ сорҕото атыыланыаҕа. Маны сэргэ федеральнай бырабыыталыстыба бырыһыан ыстаапкатын аччатыыга уонна ипэтиэкни ылар кыаҕы улаатыннарыыга үлэни ыытар. Онон дьиэҕэ наадыйыы өссө улаатыаҕа “, — диэтэ СИА-ҕа өрөспүүбүлүкэ тутууга миниистирин солбуйааччы Павел Аргунов.

Федеральнай сокуон саҥа ирдэбиллэрэ кытаанахтар уонна тутааччылар сорохторо эрэ бу ирдэбилгэ эппиэттэһэр кыахтаахтар.  Мантан сылтаан сыана үрдүөн сөп. Үгүс тутааччылар билигин түргэнник тутарга тиэтэйбэттэр, сыана үрдүүрүн кэтэһэн.

“Инники өттүгэр тутааччылар монополиялара  үөскүөҕэ. Кыра хампаанньалар тутар уонна кирэдьиит ылар кыаҕа суох буолуохтара, онон ырыынакка улахаттар эрэ хаалыахтара. Маны сэргэ сокуон быһыытынан  тутааччы биир эрэ эбийиэги тутан таһаарыахтаах, оттон бу дьиэ-уот тиийбэтигэр тиэрдиэҕэ”, — диэн СИА-ҕа “Новые высоты” хамсаабат баай-дуол агентствотын үлэһиттэрэ эттилэр.

”Экспердэр сыанабылларынан, саҥа дьиэ аҕыйаҕа кв. миэтэрэ сыанатын үрдүүрүгэр тиэрдиэҕэ. Ол кэнниттэн ити саҥа тутуллар дьиэ ырыынага иккис ырыынагы хамсатан, сыана онно эмиэ улаатыаҕа. Өссө биир ый анараа өттүгэр саҥа тутуллар дьиэҕэ кв. миэтэрэни 65 тыһ. солк. диир буоллахтарына, бүгүн сыана 72 тыһ. солк диэри халбаҥнаата. Риэлтордар этэллэринэн, Дьокуускайга биир тутуу хампаанньатыгар “квадрат” сыаната 73 тыһыынча солкуобайга тиийбит.

“Балаҕан ыйыгар бары тутааччылар анал счекка (эскроу счет буолбатах) көстүлэр. Ол аата клиент боломуочуйалаах баантан эбийиэги тутууга бырайыактыыр үбүлээһини ылыахтаах. Хампаанньалар бүгүн бу бырайыактыыр үбүлээһининэн мачайданымаары кыбартыыраларын барытын атыылыыр соруктаахтар. Маны сэргэ толуйар фонда хас кыбаартал ахсын бэйэтин бырыһыанын ыстаапкатын үрдэтэн иһэр. Саҥа дьыл кэнниттэн кыбартыыра сыанатыттан 6 бырыһыаны аһарыаҕа. Бу ороскуоттары барытын өлүүлэһэн тутууга кыттыспыт дьон сүгэллэр. Онон тохсунньу 1 күнүттэн сыана аччаабыта 6 бырыһыан үрдүөҕэ”, — диэтилэр агентствоҕа.

This post was published on 05.10.2018 13:31 13:31