Дьокуускайга баһылыктар семинардара саҕаланна

0
155

Улуус, нэһилиэк баһылыктара сылга биирдэ бары Дьокуускайга мустан бырабыыталыстыбаны, Ил Дарханы кытары көрсөллөрө үгэскэ кубулуйда. Бүгүн бырабыыталыстыба чилиэннэрин кытта семинар-мунньахха кыттыахтара, диэн edersaas.ru иhитиннэрэр.

Санатан эттэххэ, бу маннык көрсүһүү 2012 сылтан ыытыллар. Көрсүһүүгэ нэһилиэк баһылыктара миниистирдэри кытары атах тэпсэн олорон күннээҕи кыһалҕаларыттан саҕалаан өрөспүүбүлүкэ сайдыытыгар тиийэ кэпсэтэллэр.  Маннык былаһаакка тэриллиэҕиттэн, баһылыктар уонна миниистирдэр икки ардыларыгар “мин эппитим”, “боротокуолга киллэртэрбитим”, “көрүөхпүт” диэн кэпсэтиилэрэ тохтоото. Ити олохтоох салайыныы уонна өрөспүүбүлүкэ салалтатын икки ардыгар көдьүүстээх үлэни тэрийиигэ төһүү күүс буолла.

Бүгүҥҥү семинар-мунньахха Экономика, Үп миниистирдэрэ өрөспүүбүлүкэ быйылгы сыллаах былаанын кытары билиһиннэриэхтэрэ. Быйылгыттан регион салалтата үлэ саҥа ньыматыгар (бырайыагынан үлэҕэ) киирэринэн уонна 2030 с. диэри сайдыыбыт тосхоло, стратегията оҥоһуллубутунан, онно болҕомто ууруллуоҕа. Манна сыһыаран эттэххэ, регион уонна олохтоох салайыныы биир бырайыакка үлэлиир усулуобуйаларын быйыл Үөһээ Бүлүүгэ буолуохтаах “Манчаары оонньууларын” холобуругар көрүөхтэрэ. Бу туһунан Ил Дархан Егор Борисов былырыын сылы түмүктүүр пресс-конференциятыгар этэн турар.

Ону сэргэ Үп министиэристибэтэ муниципальнай тэриллиилэргэ үс сыл устата үбүлээһин хайдах барыаҕын иһитиннэриэҕэ. Онно улахан болҕомто хамнаһы төлөөһүҥҥэ ууруллуоҕа. Даҕатан эттэххэ, бэҕэһээ Егор Афанасьевич Амма улууһун Покровкатыгар баран хамнаска иэстээх олорор бааһынай хаһаайыстыба үлэһиттэрин кытта көрсөн кыһалҕаларын быһаарыста. Бурдугунан дьарыктанар “Амма” бааһынай хаһаайыстыба уустук балаһыанньаҕа түбэспитин туһунан Ил Дархан пресс-конференциятыгар суруналыыстар санатан тураллар. Бу боппуруоска сыһыаран Егор Борисов анал этиитигэр хаһаайыстыбаннай тэрилтэлэри кытары үлэ күүһүрүөхтээҕин бэлиэтээбитэ. Онтон улуус баһылыктарыгар туһаайан ахсынньытааҕы мунньахха “тохсунньуга бары тэрилтэлэргитин бэрэбиэркэлээҥ, көрүҥ” диэн эппитэ.

Мунньахха биир улахан боппуруоһунан муниципальнай быыбардары ырытыахтара. Санатан эттэххэ, быйыл күһүн 31 улууска уонна үгүс нэһилиэккэ быыбардар ыытыллыахтара. Бу кэнники киирбит уларыйыылартан санаттахха, хандьыдааттар испииһэктэригэр “барыларын утарабын” диэн графа эбиллэн биэрбитэ.

Быйыл Россияҕа Экология сыла ыытылларынан, бөҕү-саҕы хомуйууга ураты болҕомто ууруллуоҕа. Бу сылга өрөспүүбүлүкэҕэ киин оператор бигэргэтиллэн, бөҕү хомуйууга, туһаҕа тахсары туспа наардааһыҥҥа үлэ барыахтаах.

Маны таһынан, нэһилиэнньэлээх пууннары тупсаран оҥорууну, дьиэлэри киин ититэр систиэмэҕэ холбооһуну, гаас ситимин тардыыны, саҥа үлэ миэстэтин таһаарыыны, о.д.а. боппуруостары баһылыктар болҕомто киинигэр тута сылдьыахтара.

Сарсын баһылыктар Ил Дарханы кытары көрсүһүөхтэрэ, муниципальнай тэриллиилэр сэбиэттэрин VI сийиэстэригэр кыттыахтара.

0
0

Хоруй суох

Хоруйдаа