Россия Силиэстийэлиир кэмитиэтин Саха сиринээҕи силиэстийэлиир управлениетыгар иһитиннэрбиттэринэн, 46 саастаах эр киһи өлүгүн Бүлүүлүүр суол 15-ис километрыгар булбуттар, холуобунай дьыала тэриллибит.
Сарсыныгар полиция үлэһиттэрэ бу буруйу оҥорууга өлүөхсүт урут бииргэ үлэлээбит коллегатын уорбалаан туттулар.
Тохсунньу 23 күнүгэр бу дьон Хатыҥ Үрэххэ баар гаражка арыгылаабыттара биллибит. Бу олорон айдаарсан турбуттар. Уорбаланааччы быһах ойутан таһаарбыт уонна табаарыһын түөһүн диэки туһулаан хаста да охсубут. Ол түмүгэр киһитэ өлбүт.
Өлүгү массыынатыгар уган Бүлүүлүүр суол 15-ис километрыгар таһааран бырахпыт. Түүн буолан, даачаттан чугас тохтообутун өйдөөбөтөх. Ол иһин өлүгү сарсыныгар даача хаһаайына булбут.
Тохсунньу 25 күнүгэр Дьокуускай куораттааҕы суут уурааҕынан уорбаланааччы хаайылынна. Холуобунай дьыала тэриллэн, экспертнэй чинчийиилэр ананнылар, буруйу оҥоруу бары өрүттэрэ быһаарыллыахтара. Силиэстийэ салҕанар.
