Дьокуускай куорат баһылыгын болдьоҕун иннинэ быыбара кулун тутар 28 күнүгэр буолуо. Маннык быһаарыыны куорат Дууматын дьокутааттара бүгүн, IV уочараттаах мунньах кэмигэр ылыннылар.
Быыбардыыр учаастактар сорохторо оскуоларга тэриллэллэрин иһин кулун тутар 28 күнэ, оҕолор сааскы сынньалаҥҥа баралларынан, ордук табыгастаах, диэн быһаарда Дуума бэрэссэдээтэлэ Альберт Семенов. Кини сайын үөрэнээччилэр биир кэлим эксээмэн туттаралларын, билиҥҥитэ чуолкай күнэ биллибэтин эттэ.
Кулун тутар 28 күнүгэр куоластааһыны ыытар туһунан боппуруоһу 18 дьокутаат өйөөтө, 7 утарда.
Санатар буоллахха, тохсунньуга куорат баһылыга Сардана Авксентьева доруобуйатын туругунан болдьоҕун иннинэ боломуочуйатын устунарын эппитэ.
