Дьокуускай куоракка Ыһыах иннинэ саҥа дьиэҕэ киирээччилэргэ күлүүһү туттарыы үгэскэ кубулуйда.
Бэс ыйын 24 күнүгэр, Туймаада Ыһыаҕын иннинэ, куорат киинигэр турар Лермонтов уулуссатын 26-с нүөмэрдээх дьиэтигэр саҥа кыбартыыралары саахалланар туруктаах уонна эргэ дьиэлэртэн көһөрүү бырагырааматын кыттыылаахтара ыллылар.
Саҥа дьиэҕэ киирэччилэри Дьокуускай куорат баһылыга Айсен Николаев, Заполярье уонна Уһук Хотугу сир куораттарын сойууһун президенэ Игорь Шпектор уонна СӨ архитектура уонна тутуу комплексын миниистирэ Вера Кузакова эҕэрдэлээтилэр.
– Мин дойду араас куораттарыгар федерация биэрэр үбүн сөпкө туһамматтарын кыһалҕатын куруук көрсөбүн. Оттон Дьокуускайга бу соругу ситиһиилэхтик толороллор. Ити салайааччыттан тутулуктаах дии саныыбын, – диэн туран Игорь Шпектор куорат олохтоохторун барыларын бу кэрэ-бэлиэ түгэнинэн эҕэрдэлээтэ.
Айсен Николаев эппитинэн, 2013-2014 сылларга бырагыраама толору туолла. «2015 сыл бырагырааматын биһиги сыл бүтүөр диэри толоруохпут. Куораппыт араас муннуктарыгар тутуулар график быһыытынан бара тураллар. Бу күннэргэ Бырабыыталыстыбаттан бюджет эбэһээтэлистибэлэрин хааччаҕын ылыахпыт уонна куонкурус биллэриэхпит», – диэн суруналыыстарга иһитиннэрдэ.
Саҥа дьиэҕэ киирбит дьон аатыттан Анастасия Петрова эҕэрдэ тылы этэригэр өрөспүүбүлүкэ уонна куорат салалталарыгар махталын биллэрдэ уонна олорор сирдэрин ыраастык көрөргө-истэргэ эрэннэрдэ.
Уопсастыбаннаһы кытары үлэлиир департамеҥҥа иһитиннэрбиттэринэн, 2012 сыл тохсунньу 1 күнүгэр диэри тахсыбыт быһаарыынан саахалланар кутталлаахха киирсэр дьиэҕэ олорооччулар 2017 сыл бүтүөр диэри саҥа дьиэлэргэ көһүөхтэрэ.
