Ааспыт нэдиэлэ бүтүүтэ сорох көрдөрөр-иһитиннэрэр тиһиктэр нөҥүө Ил Түмэн үс дьокутаата: Иван Андросов, Владимир Федоров уонна Владимир Федоров мунньах кэнниттэн охсуспуттарын курдук сурах өрөспүүбүлүкэни тилийэ тарҕаммыта. Ил Түмэн мандаатын уонна регламенын хамыыһыйатын салайааччыта Марфа Филиппова бу быһыыны-майгыны хамыыһыйаҕа көрөр сайабылыанньа киирбэтэҕин туһунан СИА-ҕа эттэ.
Сорох иһитиннэрэр тиһиктэр норуот дьокутааттара итириктэрин суруйбута. Ол эрээри, дьокутаат, НКИК «Саха» генеральнай дириэктэрэ Иван Андросов итирик буолбатаҕын, ону туоһулуур докумуоннааҕын эппитэ. Кини охсуспатаҕын, төттөрүтүн араллааны таһаарааччылары тохтото сатаабытын туһунан этэр. Ону таһынан кини сураҕы тарҕаппыт көрдөрөр-иһитиннэрэ тиһиктэри суукка биэрээри сорунар.
Ил Түмэн мандаат, регламент хамыыһыйата сайабылыанньа суоҕунан, бу дьыаланы көрбөт. «Сайабылыанньа суох, онон ырытыыга, көрүүгэ төрүөт суох», — диэтэ Марфа Филиппова.
