Сахабыт сирин киин куоратыгар бэҕэһээҥҥиттэн, бэс ыйын 4 күнүттэн биир саамай хаачыстыбалаах уматыгы атыылыыр «Саханефтегазсбыт» хампаанньа бары көрүҥнээх бензиҥҥэ сыананы үрдэттэ. Холобур, АИ-95 билигин 52 солк. 60 харчы буолла (1 солк. 80 харчынан үрдээтэ). Биллэн турар, биир солкуобай дьыаланы быһаарбат бытархай курдук саныыбыт эрээри, уматык сыаната үрдээбитэ өрөспүүбүлүкэҕэ таһаҕаһы тиэйиигэ быһаччы сабыдыаллаан, ас-таҥас, эмп-томп, табаар сыаната сыыйа үрдээн барыан сөп.
edersaas.ru
«Саханефтегазсбыт» АУо генеральнай дириэктэрэ Игорь Никитин «Роснефть» уонна «Газпром» курдук бөдөҥ хампаанньалар акцизтарын сыанатын үрдэтэннэр, уматык сыаната дойду үгүс регионнарыгар ыараата диэн балаһыанньаны быһаарар.
Ол да буоллар Арассыыйа Бырабыыталыстыбата нефтяной хампаанньалар бензиҥҥэ уонна дизельнэй уматыкка сыананы биир халыыпка туталларын туһугар кэпсэтиини ыытта. Вице-премьер Дмитрий Козак этэринэн, бэс ыйын 1 күнүттэн уматык акциһын сыаната түһүөхтээх.
Оччотугар, «Саханефтегазсбыт» уматыгын сыаната урукку кээмэйигэр төннүөхтээх. Дьокуускайга бензин сыаната бүтэһигин 2017 с. сэтинньитигэр үрдүү сылдьыбыта.
Атын заправкалары тэҥнээн көрдөххө, сыана маннык:
— ЯТЭК, АИ-95 — 48,2 солк;
— Сибойл, АИ-95 — 50,9 солк. (2018 с. ыам ыйын 21 күнүгэр үрдэтиллибит сыананан);
— Туймаада-Нефть, АИ-95 — 50,6 солк;
— Парiтет, АИ-95 — 49,5 солк.
Көстөрүн курдук, куоракка саамай сыаналаах бензини урукку үгэһинэн «Саханефтегазсбыт» атыылыыр.
Тэҥнээн көрдөххө, Москва куоракка АИ-92 сыаната 37,02 солк. 40, 35 солк. халбаҥныыр, АИ-95 уматык сыаната 40,03 солк. – 44,65 солк. Арассыыйа үрдүнэн саамай үрдүк сыаналаах уматык Уһук Илин, чуолаан Саха сиригэр баара бэлиэтэнэр. Соҕурууҥҥу федеральнай уокурукка бензиннэрэ 37,72 солк., Уралга 35,28 солк.
Сир баайдаах Туркменистан дойдутугар нэһилиэнньэҕэ хас биирдии киһи аайы ыйга 120 л. бензини босхо кутан биэрэллэр. Олохтоохтор, ууну-уоту, гааһы, дьиэтээҕи төлөпүөнү эмиэ төлөөбөттөр, буор босхо туһаналлар. Ону таһынан, туркменнар дьиэ атыылаһалларыгар судаарыстыба аҥаарын төлүүр уонна 30 сылга диэри болдьохтоон чэпчэтиллибит 1% кирэдьиит биэрэр.
Оттон Дьокуускай куоракка уматык сыаната ыараабытын тилэх баттаһа автобус төлөбүрэ от ыйын 1 күнүттэн уу харчынан төлөһөргө 30 солк. тиийэ үрдүөхтээх. Траснпортнай уонна социальнай картанан айан 16-27 солк. тэҥнэһиэ.
Ону тэҥэ, хомунаалынай хаһаайыстыба төлөбүрэ кэлэр ыйтан 6% эмиэ эбиллиэхтээх.
Марианна Тыртыкова, «Саха сирэ», edersaas.ru
