Аан дойдуга кинигэ күнүн өрөспүүбүлүкэбит улууһун бары бибилэтиэкэлэрэ сыллата өрө көтөҕүллүүлээхтик, ураты сэргэхтик бэлиэтиир үтүө үгэстээхтэр. Таатта улууһун Дьохсоҕон нэһилиэгэр «Алампа» КСК бэртээхэй күрэстэһии буолбут.
Ааҕар киһи билиилээх, билиилээх киһи сайдыылаах, сайдыылаах киһи ситиһиилээх диэн мындыр этиинэн сиэттэрэн, олохтоох бибилэтиэкэ сэбиэдиссэйэ Галина Другина бэртээхэй блиц-турнир тэрийбит. Билиилэрин-көрүүлэрин тургута түөлбэлэртэн үстүү киһилээх хамаандалар күөн көрсүбүттэр. Ыйытыы үбүлүөйдээх биир дойдулаахтарыгар, ытык дьоҥҥо: саха литературатын төрүттээччилэртэн биирдэстэригэр Алампаҕа, саха норуодунай суруйааччыларыгар Амма Аччыгыйыгар, Суорун Омоллооҥҥо, кинилэр айымньыларыгар анаммыт.
Билиини-көрүүнү тургутуһуу, ыйытыыларга толору хоруйдары биэрии күрэстэһиитэ сытыытык барбыт. Биэтэккэ хайа хамаанда кыайыылаах тахсарыгар уустуктар үөскүү сылдьыбыттар. Ол да гыннар, түмүккэ барыларыттан чорбойон, «Боробул» түөлбэ хамаандата кыайыылааҕынан тахсан, дьонун-сэргэтин улаханнык үөрдүбүт. Иккис бириистээх миэстэҕэ «Саар Ыаҕас», үһүскэ эмиэ бу түөлбэ иккис хамаандата тахсан, сыллааҕы үлэлэрин былааныгар эбии баал аахсыбыттарыттан улаханнык астыммыттар. Нэһилиэк олохтоохторо күрэстэһииттэн сэргэхсийэн, үөрэн тарҕаспыттар.
Сардаана Баснаева.
